रहस्यांनी व्यापलेली कथा आणि अनुत्तरित प्रश्न

इतिहासाच्या गर्भात दडलेली अनेक रहस्यं कधीच उलगडत नाहीत; ती अनुत्तरितच राहतात. काही रहस्यांचा शोध घेतला की ती आणखी गूढ प्रश्नांना जन्म देतात. महाराष्ट्रातील दुर्गम भागात वसलेल्या ‘सालबर्डी’ गावात दडलेल्या अशाच एका रहस्याचा शोध आणि तिथे घडणाऱ्या विचित्र घटनांची थरारक कहाणी मांडणारा ‘सालबर्डी’ हा चित्रपट एप्रिल महिन्यात प्रेक्षकांच्या भेटीला येत आहे.

दुर्गम गावातील भीषण वास्तवाचा शोध

‘सालबर्डी’ या गावात घडणाऱ्या रहस्यमय घटनांचा तपास आणि त्या तपासातून समोर येणारे काळकभिन्न वास्तव हा या चित्रपटाचा गाभा आहे. भय आणि भ्रम यांच्या विळख्यात अडकलेल्या अनपेक्षित घटनांमागचं ‘रहस्य’ शोधताना पुढे काय घडणार, हे सत्य कोण आणि कशा प्रकारे उघड करणार—याची उत्सुकता चित्रपटभर टिकून राहते. भीती, थरार आणि विश्वास-अविश्वास यांचा अकल्पित अनुभव देणारा हा प्रवास प्रेक्षकांसाठी अंगावर काटा आणणारा ठरणार आहे.

पोस्टरमधून उमटणारी थराराची झलक

प्रदर्शित झालेल्या पोस्टरमधूनच ‘सालबर्डी’च्या विषयातील भीषणता अधोरेखित होते. अंधारलेलं वातावरण, गूढ संकेत आणि अस्वस्थ करणारी शांतता—या साऱ्यामुळे चित्रपटाचा थरार अधिक गडद होतो. मराठीतल्या उत्तम कलाकारांची मांदियाळी या चित्रपटात असून, हे कलाकार कोण आहेत याबाबत सध्या गुप्तता राखण्यात आली आहे.

निर्मिती, दिग्दर्शन आणि तांत्रिक बाजू

नेब्यूला फिल्म्स निर्मित ‘सालबर्डी’ चित्रपटाची निर्मिती अनिल देवडे पाटील, डॉ. गजानन जाधव आणि राम जाधव यांनी केली आहे. दिग्दर्शनाची धुरा रमेश साहेबराव चौधरी यांनी सांभाळली आहे. छायांकन आणि संकलन सिद्धेश संतोष मोरे यांचे असून, पटकथा व संवाद रोहित शुक्रे यांनी लिहिले आहेत.

संगीत, पार्श्वसंगीत आणि कलात्मक टीम

गुरु ठाकूर आणि मुकुंद भालेराव यांच्या गीतांना पद्मनाभ गायकवाड यांचे संगीत लाभले आहे. पार्श्वसंगीताची जबाबदारी अमर मोहिले यांनी सांभाळली आहे. अजय गोगावले, जावेद अली आणि आनंदी जोशी यांच्या आवाजातील गाणी चित्रपटाला विशेष उंची देतात. नृत्यदिग्दर्शन फुलवा खामकर आणि आशीष पाटील यांचे आहे. कार्यकारी निर्माते दिपक कुदळे पाटील असून, वेशभूषा प्रणिता चिंदगे आणि रंगभूषा श्रीनिवास मेनूगे यांनी साकारली आहे. कलादिग्दर्शन प्रदीप गुरव यांचे आहे.

एप्रिलमध्ये उलगडणार भयाचा थरार

रहस्य, भय आणि भ्रम यांच्या धूसर सीमारेषेवर उभा असलेला ‘सालबर्डी’ हा थरारपट प्रेक्षकांना वेगळ्याच अनुभवात घेऊन जाण्याचे आश्वासन देतो. एप्रिल महिन्यात प्रेक्षकांसमोर येणाऱ्या या चित्रपटातून ‘सालबर्डी’चं भयावह सत्य कसं उलगडतं, हे पाहणं नक्कीच थरारक ठरणार आहे.