‘पुन्हा एकदा साडे माडे तीन’चं धमाकेदार प्रमोशनल साँग चर्चेचा केंद्रबिंदू!

कुरळे बंधूंची केमिस्ट्री म्हणजे केवळ नातं नाही, तर धमाल, टोमणे, खट्याळपणा आणि मनमोकळ्या आनंदाचा अखंड उत्सव आहे. हाच उत्सव आता बहुप्रतीक्षित मराठी चित्रपट पुन्हा एकदा साडे माडे तीन च्या नव्या प्रमोशनल साँगमधून प्रेक्षकांच्या भेटीला आला आहे. टीझर आणि ट्रेलरला मिळालेल्या भरघोस प्रतिसादानंतर हे निरागस शब्दांनी आणि जबरदस्त एनर्जीने भरलेलं प्रमोशनल साँग सध्या सोशल मीडियावर जोरदार व्हायरल होत आहे.

अवधूत गुप्तेंचा आवाज, धमाल संगीत आणि हसतखेळत शब्द

या गाण्याला अवधूत गुप्ते यांच्या खणखणीत आणि उत्स्फूर्त आवाजाने वेगळीच चैतन्याची लहर दिली आहे. गौरव चाटी आणि आदित्य बेडेकर यांच्या संगीतामुळे गाण्याला धमाल टच मिळतो, तर विक्रांत हिरनाईक यांच्या साध्या, निरागस आणि मनाला भिडणाऱ्या शब्दांतून तीन भावांमधील घट्ट नातं, इनोसंट बॉण्डिंग आणि मस्तीदार केमिस्ट्री सुंदरपणे उलगडते. गाणं ऐकताना पाय आपोआप थिरकतात आणि चेहऱ्यावर नकळत हसू उमटतं—म्हणूनच हा ट्रॅक खऱ्या अर्थाने ‘फील गुड’ ठरतो आहे.

प्रमोशनल साँगमागची वेगळी कल्पना

या प्रमोशनल साँगची निर्मिती प्रक्रिया देखील तितकीच इंटरेस्टिंग आहे. चित्रपटाच्या कथेत गाण्यासाठी स्वतंत्र सीन नसल्यामुळे प्रमोशनल साँग करण्याचा निर्णय घेण्यात आला. मात्र, चित्रपटातील पहिलं गाणं अजय–अतुल यांचं असल्याने ते प्रेक्षकांच्या मनात खोलवर रुजलेलं होतं. त्यामुळे त्याच भावविश्वाशी सुसंगत, तरीही वेगळ्या ढंगाचं आणि आपलेपण जपणारं गाणं देण्याचा विचार करण्यात आला.

दिग्दर्शक अंकुश चौधरी यांची भूमिका

याबाबत दिग्दर्शक अंकुश चौधरी सांगतात, “चित्रपटात गाणं बसवता येईल असा सीन नव्हता, म्हणून प्रमोशनल गाण्याचा विचार केला. पहिलं गाणं प्रेक्षकांच्या मनात आपली खास जागा निर्माण करून गेलं होतं. त्यामुळे त्याच भावनेला पुढे नेणारं, पण वेगळ्या मांडणीचं काहीतरी करायचं होतं. अजय–अतुल यांच्याशी चर्चा झाली होती, मात्र त्यांच्या इतर कमिटमेंटमुळे ते शक्य झालं नाही. एका सेशनदरम्यान चित्रपटातील एक बॅकग्राऊंड ट्यून आठवली आणि त्याच बेसवर जबरदस्त गाणं तयार करण्याची कल्पना सुचली. यावेळी रोमँटिक झोनऐवजी निरागस, इनोसंट आणि पूर्णपणे तीन भावांभोवती फिरणारं गाणं करायचं ठरवलं.”

उत्सुकता शिखरावर

टीझर, ट्रेलरनंतर आता प्रमोशनल साँगने ‘पुन्हा एकदा साडे माडे तीन’ची उत्सुकता शिखरावर नेली आहे. तीन भावांचा हा धमाकेदार, निरागस आणि मनमोकळा जल्लोष मोठ्या पडद्यावर अनुभवण्यासाठी प्रेक्षक आतुरतेने वाट पाहात आहेत. हा चित्रपट येत्या ३० जानेवारी रोजी सर्वत्र प्रदर्शित होत आहे.

तगडी स्टारकास्ट आणि भक्कम निर्मिती

या चित्रपटात भरत जाधव, मकरंद अनासपुरे, सिद्धार्थ जाधव आणि रिंकू राजगुरू यांच्या प्रमुख भूमिका असून संजय नार्वेकर पाहुणे कलाकार म्हणून झळकणार आहेत.

सुशीलकुमार अग्रवाल आणि Ultra Media & Entertainment प्रस्तुत, उषा काकडे प्रॉडक्शन्स, ईओडी मीडिया यांच्या सहभागाने आणि अमेय विनोद खोपकर पिक्चर्स यांच्या सहकार्याने साकारलेल्या या चित्रपटाचे दिग्दर्शन अंकुश चौधरी यांनी केले आहे. उषा काकडे, पुष्कर यावलकर, सुधीर कोलते, स्वाती खोपकर आणि निनाद नंदकुमार बत्तीन हे निर्माते असून मोहसिन खान, यशराज टिळेकर, सौरभ ललवाणी आणि धनविक एंटरटेनमेंट सहनिर्माते आहेत.

मनोरंजन, आपलेपणा आणि निरागस धमाल यांचा संगम असलेला ‘पुन्हा एकदा साडे माडे तीन’ प्रेक्षकांसाठी एक परिपूर्ण फॅमिली एंटरटेनर ठरणार, याबद्दल आता शंका उरलेली नाही.