१० व्या अंबरनाथ मराठी चित्रपट महोत्सव (AMFF) २०२६ मध्ये मराठी चित्रपटसृष्टीतील नव्या दिग्दर्शक प्रतिभेचा गौरव करत ‘सर्वोत्कृष्ट पदार्पण दिग्दर्शक’ हा मानाचा पुरस्कार दिग्दर्शक आलोक जैन यांना सकाळ तर होऊ द्या या चित्रपटासाठी प्रदान करण्यात आला. कथनशैलीतील वेगळेपणा आणि आशयाची संवेदनशील मांडणी यामुळे ‘सकाळ तर होऊ द्या’ने परीक्षकांचे विशेष लक्ष वेधून घेतले.

या पुरस्कारामुळे आलोक जैन हे मराठी चित्रपटसृष्टीतील एक आश्वासक दिग्दर्शक म्हणून अधिक ठळकपणे समोर आले आहेत. त्यांच्या दिग्दर्शनात विषयाची स्पष्टता, व्यक्तिरेखांची मांडणी आणि भावनिक प्रवाह यांचा समतोल जाणवतो, अशी प्रतिक्रिया परीक्षकांनी व्यक्त केली.

अंबर भरारी आणि अखिल भारतीय मराठी चित्रपट महामंडळ यांच्या संयुक्त विद्यमाने आयोजित करण्यात आलेल्या या महोत्सवात फिचर फिल्म्स आणि लघुपटांचे दर्जेदार सादरीकरण पाहायला मिळाले. दिग्गज कलाकारांसोबतच नवोदित कलावंतांनाही व्यासपीठ देणारा हा महोत्सव मराठी चित्रपटसृष्टीसाठी महत्त्वाचा मानला जातो.

भव्य समारोप सोहळ्यात पार पडलेल्या या पुरस्कार वितरणामुळे मराठी चित्रपटसृष्टीतील नव्या प्रयोगशीलतेला आणि नवोदित दिग्दर्शकांना नवी ऊर्जा मिळाल्याचे चित्र दिसून आले.