झी स्टुडिओजच्या नव्या रहस्यमय चित्रपटाची घोषणा; पोस्टरनेच वाढवली उत्सुकता

कोकण म्हटलं की डोळ्यांसमोर उभा राहतो तो निसर्गरम्य सागरकिनारा, हिरवाईने नटलेली डोंगररांग आणि गावागावांत फिरणाऱ्या गूढ, रहस्यमय कथा. भूत-प्रेतांच्या गोष्टी, चुलीपाशी रंगणाऱ्या गजाली आणि वीतभर घडलेली गोष्ट हातभर करून सांगण्याची गावकुसातील शैली — या सगळ्या वातावरणातून एक नवा चित्रपट आकाराला येत आहे. झी स्टुडिओज प्रस्तुत ‘तुंबाडची मंजुळा’ हा चित्रपट होळीच्या निमित्ताने सोशल मीडियावर मोशन पोस्टरद्वारे जाहीर करण्यात आला आणि पहिल्याच क्षणापासून चर्चेचा विषय ठरला.

गूढ चेहरा, अडकलेले हात आणि अर्धवट बंद दरवाजा — पोस्टरमधील थरार

या चित्रपटाच्या पोस्टरमध्ये एका घराच्या अर्धवट बंद दाराआड दिसणारा गूढ चेहरा आणि दोन्ही कवाडांमध्ये अडकलेले हात असे भयचकित करणारे चित्र दिसते. जणू घरातून बाहेर पडण्यासाठी कोणीतरी धडपड करत आहे, अशी भावना निर्माण करणारे हे पोस्टर प्रेक्षकांच्या मनात प्रश्नांची मालिका उभी करते. नेमकी ही मंजुळा कोण? तिच्या मागचं रहस्य काय? या उत्सुकतेने सोशल मीडियावर चर्चांना उधाण आलं आहे.

५ जूनला जागतिक पर्यावरण दिनी प्रेक्षकांच्या भेटीस

‘तुंबाडची मंजुळा’ हा चित्रपट येत्या ५ जून रोजी, म्हणजेच जागतिक पर्यावरण दिनी प्रदर्शित होणार आहे. कोकणातील परंपरा, गावकुसातील गूढ वातावरण आणि निसर्गाच्या सान्निध्यात उलगडणारी कथा यांचा संगम या चित्रपटात अनुभवायला मिळणार आहे, अशी अपेक्षा व्यक्त केली जात आहे.

नव्या दमाच्या दिग्दर्शकाचं पदार्पण

पूर्णपणे झी स्टुडिओज निर्मित या चित्रपटाद्वारे विविध कोरगावकर दिग्दर्शक म्हणून पदार्पण करत आहेत. नव्या पिढीच्या दिग्दर्शकाचा हा पहिलाच चित्रपट असल्याने त्याकडे विशेष लक्ष लागले आहे. निर्मितीची धुरा उमेशकुमार बन्सल आणि बवेश जानवलेकर यांनी सांभाळली आहे.

कलाकार आणि कथा अद्याप गुलदस्त्यात

या चित्रपटात नेमके कोणते कलाकार असतील, कथानकाची दिशा काय असेल आणि ‘तुंबाडची मंजुळा’ ही व्यक्तिरेखा कोण साकारणार, याबाबत अद्याप कोणतीही अधिकृत घोषणा झालेली नाही. त्यामुळे प्रेक्षकांची उत्सुकता आणखी वाढली आहे.

मराठी प्रेक्षकांच्या मातीशी जोडलेला विषय – बवेश जानवलेकर

या नव्या चित्रपटाबाबत बोलताना झी स्टुडिओज मराठीचे व्यवसाय प्रमुख बवेश जानवलेकर म्हणाले की, मराठी प्रेक्षक आधुनिक विचारसरणीचा असला तरी तो आपल्या मातीशी आणि परंपरेशी घट्ट जोडलेला आहे. गावाकडची कथा आणि स्थानिक संस्कृतीवर आधारित विषय त्याला कायम भावतात. मागील वर्षी प्रदर्शित झालेला ‘दशावतार’ हा चित्रपट याचं उदाहरण ठरला. ‘तुंबाडची मंजुळा’ हा देखील असाच गावकुसातील वेगळा अनुभव देणारा चित्रपट ठरेल, असा विश्वास त्यांनी व्यक्त केला.

पहिल्याच पोस्टरपासून चर्चेत आलेला ‘तुंबाडची मंजुळा’ हा चित्रपट आता प्रेक्षकांच्या प्रतीक्षेचा विषय बनला आहे. ५ जूनला हा रहस्यपूर्ण अनुभव रुपेरी पडद्यावर नेमका कसा उलगडतो, याकडे सर्वांचे लक्ष लागले आहे.