स्टेजवर उभा राहून सलग दोन तास केवळ बोलण्याच्या जोरावर प्रेक्षकांना खळखळून हसवणं हे काही सोपं काम नाही. पण स्टँडअप कॉमेडीच्या या अनोख्या कलेतून अनेक कलाकार आज प्रेक्षकांचं मनोरंजन करताना दिसतात. अशाच कलाकारांमध्ये सध्या वेगळं स्थान निर्माण केलेलं नाव म्हणजे स्टँडअप कॉमेडियन मंदार भिडे. आपल्या खास शैलीतून आणि अचूक टायमिंगमधून प्रेक्षकांना हसवणारे मंदार भिडे आता संपूर्ण महाराष्ट्राला हसवण्यासाठी सज्ज झाले आहेत.

कॉर्पोरेट नोकरी सोडून स्टँडअप कॉमेडीचा प्रवास

मंदार भिडे यांनी काही वर्षांपूर्वी मोठ्या पगाराची कॉर्पोरेट नोकरी सोडून पूर्णवेळ स्टँडअप कॉमेडी करण्याचा धाडसी निर्णय घेतला. सुरुवातीला छोट्या-मोठ्या स्टेजवरून सादरीकरण करत त्यांनी आपल्या विनोदाच्या शैलीतून प्रेक्षकांची मनं जिंकली. त्यांच्या विनोदात दैनंदिन आयुष्यातील निरीक्षणं, साधे पण नेमके संवाद आणि प्रसंगांची रंगतदार मांडणी असल्यामुळे प्रेक्षकांना त्यांच्याशी लगेच नातं जोडता येतं.

अचूक टायमिंग आणि क्लीन कॉमेडीची खासियत

मंदार भिडे यांच्या कॉमेडीची खासियत म्हणजे त्यांचं अचूक टायमिंग आणि ‘क्लीन कॉमेडी’ची शैली. त्यांच्या कार्यक्रमात अगदी लहान मुलांपासून ते आजी-आजोबांपर्यंत सगळेच मनमोकळेपणाने हसू शकतात. कोणत्याही प्रकारचा आक्षेपार्ह मजकूर न वापरता फक्त प्रसंग आणि निरीक्षणांच्या माध्यमातून हसवणं ही त्यांची ताकद मानली जाते. त्यामुळे त्यांच्या शोला कुटुंबासोबत येणाऱ्या प्रेक्षकांची संख्या मोठी असते.

महाराष्ट्रातील विविध शहरांत भेटणार प्रेक्षकांना

आपल्या महाराष्ट्र टूरबद्दल बोलताना मंदार भिडे सांगतात की, आतापर्यंत त्यांनी अनेक ठिकाणी परफॉर्म केलं आहे, मात्र महाराष्ट्रातील विविध शहरांमध्ये जाऊन तिथल्या प्रेक्षकांना प्रत्यक्ष भेटणं हा अनुभव नक्कीच वेगळा असणार आहे. महाराष्ट्रात दर बारा कोसावर भाषा बदलते, त्यामुळे प्रत्येक ठिकाणच्या प्रेक्षकांसमोर स्टँडअप सादर करणं हे तितकंच आव्हानात्मक आणि रोमांचक आहे.

स्टँडअप फॉरमॅट अधिक लोकांपर्यंत पोहोचवण्याचा प्रयत्न

मंदार यांच्या मते, स्टँडअप कॉमेडी हा प्रकार अजूनही अनेकांना नवीन वाटतो. त्यामुळे कुटुंबासोबत येऊन हा कार्यक्रम पाहावा आणि मोठ्या पिढीलाही या फॉरमॅटची ओळख व्हावी, हा त्यांच्या महाराष्ट्र टूरमागचा एक महत्त्वाचा उद्देश आहे. प्रेक्षकांना मनमोकळं हसायला मिळावं आणि एक हलकाफुलका अनुभव घेता यावा, यासाठी ते हा टूर करत आहेत.

लवकरच जाहीर होणार शहरांची यादी

मंदार भिडे यांची महाराष्ट्र टूर लवकरच सुरू होणार असून या टूरमध्ये राज्यातील विविध शहरांमध्ये त्यांचे शो आयोजित केले जाणार आहेत. कोकणापासून पुणे, नाशिक आणि इतर अनेक शहरांपर्यंत हा प्रवास होणार असल्याची चर्चा आहे. मात्र नेमकी तारीख आणि शहरांची अधिकृत माहिती अद्याप जाहीर करण्यात आलेली नाही.

हास्याचा धबधबा अनुभवण्याची संधी

मंदार भिडे यांचे चाहते केवळ महाराष्ट्रातच नाही तर जगभरात पसरलेले आहेत. त्यांच्या शोमध्ये उपस्थित राहून हास्याचा खळखळाट अनुभवण्याची संधी अनेकांना मिळाली आहे. आता महाराष्ट्रातील प्रेक्षकांनाही त्यांच्या थेट स्टँडअप शोचा आनंद घेण्याची संधी मिळणार असल्यामुळे चाहत्यांमध्ये उत्सुकता वाढलेली दिसत आहे.

शांततेत दडलेला थरार, मनात असंख्य प्रश्न निर्माण करणारे वातावरण आणि गूढतेची एक वेगळीच छटा… अशा उत्सुकता वाढवणाऱ्या मांडणीमुळे ‘बोल बोल राणी’ हा आगामी मराठी चित्रपट सध्या चर्चेचा विषय ठरत आहे. सिड विंचुरकर निर्मित आणि दिग्दर्शित या चित्रपटाच्या प्रदर्शनाची तारीख जाहीर झाली असून येत्या १० जुलै रोजी हा चित्रपट प्रेक्षकांच्या भेटीला येणार आहे. सोशल मीडियावर प्रदर्शित झालेल्या काही सेकंदांच्या व्हिडिओमुळे या चित्रपटाबद्दलची उत्सुकता आणखी वाढली आहे.

रहस्यमयी व्हिडिओने वाढवली उत्सुकता

सोशल मीडियावर प्रदर्शित झालेल्या या व्हिडिओमध्ये रहस्य आणि थराराचं जबरदस्त मिश्रण पाहायला मिळतं. खुर्चीत बसलेली एक तरुणी, तिचे बांधलेले हात, पार्श्वभूमीला घोंगावणारं रहस्यमयी संगीत आणि अचानक बंदुकीतून सुटलेली गोळी… या काही क्षणांच्या दृश्यांमुळे प्रेक्षकांच्या मनात अनेक प्रश्न निर्माण होत आहेत. ‘नेमकं घडलंय तरी काय?’ हा प्रश्न प्रेक्षकांना सतत पडत आहे.

गूढ शांततेत लपलेली कथा

या व्हिडिओमध्ये चित्रपटाच्या कथेबाबत कोणताही थेट उलगडा होत नाही. मात्र त्यामध्ये दडलेली अस्वस्थ करणारी शांतता आणि गूढ वातावरण चित्रपट एका वेगळ्याच पातळीवर नेणार असल्याची झलक यातून मिळते. थरारक कथानक आणि वेगळी मांडणी यामुळे हा चित्रपट प्रेक्षकांना शेवटपर्यंत खिळवून ठेवेल, अशी चर्चा रंगू लागली आहे.

सुबोध भावे, सई ताम्हणकर आणि चिन्मय मांडलेकर पुन्हा एकत्र

या चित्रपटाचं आणखी एक खास वैशिष्ट्य म्हणजे सुबोध भावे, सई ताम्हणकर आणि चिन्मय मांडलेकर हे तीन दमदार कलाकार तब्बल पंधरा वर्षांनंतर पुन्हा एकत्र झळकणार आहेत. मराठी चित्रपटसृष्टीतील हे तिघेही अनुभवी कलाकार आपल्या वेगळ्या अभिनयशैलीसाठी ओळखले जातात. त्यांच्या सोबत संभाजी ससाणेही महत्त्वाच्या भूमिकेत दिसणार असल्यामुळे चित्रपटाची उत्सुकता अधिकच वाढली आहे.

प्रेक्षकांच्या मनात निर्माण झाले प्रश्न

या व्हिडिओमधील काही क्षण प्रेक्षकांच्या मनात अनेक प्रश्न निर्माण करत आहेत. नेमकी ही मुलगी कोण आहे? तिचे हात का बांधलेले आहेत? बंदुकीतून सुटलेली गोळी नेमकी कुणासाठी आहे? आणि या सगळ्यामागे नेमकं कोणतं सत्य दडलं आहे? या प्रश्नांची उत्तरं शोधण्यासाठी प्रेक्षक आतापासूनच चर्चेत रंगले आहेत.

थ्रिलर म्हणजे प्रश्न निर्माण करणं – सिड विंचुरकर

चित्रपटाबद्दल बोलताना निर्माते आणि दिग्दर्शक सिड विंचुरकर सांगतात की, थ्रिलर म्हणजे केवळ भीती दाखवणं नव्हे, तर प्रेक्षकांच्या मनात प्रश्न निर्माण करणं आणि त्यांना शेवटपर्यंत अस्वस्थ ठेवणं. ‘बोल बोल राणी’चा हा व्हिडिओ त्या प्रवासाचा पहिला टप्पा आहे. प्रत्येक आवाज, प्रत्येक शांतता आणि प्रत्येक दृश्यामागे एक अर्थ दडलेला आहे. हा थरार अनुभवण्यासाठी प्रेक्षकांनी सज्ज राहावं.

मजबूत टीमची साथ

न्यूझिलंड मोशन पिक्चर्स आणि फिफ्टी टू फ्रायडे निर्मित या चित्रपटाचे अपूर्वा मोतीवाले सहाय, सिड विंचुरकर आणि अमित भानुशाली हे निर्माते आहेत. यश मोदी, शब्बीर सबुवाला आणि रचना वोरा सहनिर्माते म्हणून काम पाहत आहेत. तसेच तपन विचारे, यश राम शाहानी आणि आयुष कृप्लानी असोसिएट निर्माते आहेत. चित्रपटाला ए. व्ही. प्रफुल्लचंद्र यांचं संगीत लाभलं आहे.

वेगळ्या मांडणीमुळे चर्चेत ‘बोल बोल राणी’

रहस्यमयी कथानक, दमदार कलाकारांची साथ आणि वेगळ्या शैलीत सादर केलेला थरार यामुळे ‘बोल बोल राणी’ हा चित्रपट सध्या चर्चेचा विषय ठरत आहे. गूढ वातावरण आणि उत्कंठावर्धक मांडणीमुळे हा चित्रपट प्रेक्षकांना एक वेगळा अनुभव देईल, अशी अपेक्षा व्यक्त केली जात आहे. आता हा थरार नेमका काय आहे, याचा उलगडा १० जुलै रोजी चित्रपटगृहात होणार आहे.

मराठी मातीतल्या लोकपरंपरा, लोककला आणि त्यामागील वास्तव जीवनातील संघर्ष यांचे चित्रण करणारा ‘फुला’ हा चित्रपट लवकरच प्रेक्षकांच्या भेटीला येत आहे. वाघ्या-मुरळी परंपरेच्या पार्श्वभूमीवर आधारित असलेल्या या चित्रपटातून एका निरागस मुलीची वेदनादायी आणि संघर्षमय कहाणी मोठ्या पडद्यावर मांडण्यात येणार आहे. हा चित्रपट १७ एप्रिलपासून संपूर्ण महाराष्ट्रात प्रदर्शित होणार असून प्रेक्षकांना ग्रामीण संस्कृतीचा आणि वास्तवाचा वेगळा अनुभव देणार आहे.

जेजुरीत खंडेरायाच्या साक्षीने पोस्टर लाँच

चित्रपटाचे पोस्टर नुकतेच जेजुरी येथे खंडेरायाच्या साक्षीने लाँच करण्यात आले. वाघ्या-मुरळी परिषदेचे संस्थापक अध्यक्ष प्रा. मार्तंड साठे यांच्या हस्ते या पोस्टरचे अनावरण करण्यात आले. या प्रसंगी चित्रपटाचे निर्माते, दिग्दर्शक, कलाकार आणि तंत्रज्ञ मंडळी उपस्थित होती. जेजुरीसारख्या धार्मिक आणि सांस्कृतिक स्थळी पोस्टर लाँच झाल्यामुळे चित्रपटाच्या विषयाला विशेष अर्थ प्राप्त झाला आहे.

निर्मिती आणि दिग्दर्शनाची जबाबदारी

पै. अजित शिवाजी जाधव यांनी ‘फुला’ या चित्रपटाची निर्मिती केली असून शिवशर्विल मूव्ही आणि बोधी सिनेमा यांनी या चित्रपटाची प्रस्तुती केली आहे. चित्रपटाचे दिग्दर्शन अभिषेक जावीर यांनी केले असून पटकथा रवीकिरण जावीर यांनी लिहिली आहे. ग्रामीण जीवनाशी घट्ट नाळ असलेल्या या कथेला वास्तववादी पद्धतीने पडद्यावर आणण्याचा प्रयत्न या टीमने केला आहे.

संगीत, गीत आणि तांत्रिक बाजू

चित्रपटाचे संगीत दिग्दर्शन समाधान ऐवळे यांनी केले आहे. ते सांगली जिल्ह्यातील आटपाडी गावातील जिल्हा परिषदेच्या शाळेत शिक्षक असून हा चित्रपट त्यांच्या कारकिर्दीतील विशेष टप्पा ठरणार आहे. गीतलेखन रवीकिरण जावीर आणि समाधान ऐवळे यांनी केले आहे. तर अमर देवकर यांनी सर्जनशील दिग्दर्शनाची जबाबदारी सांभाळली आहे. चित्रपटाचे छायांकन प्रताप जोशी, कला दिग्दर्शन अतुल लोखंडे आणि संकलन राहुल प्रजापती यांनी केले आहे. वेशभूषा कोमल जावीर आणि अक्षता पाटील, तर रंगभूषा समाधान भोरे यांनी केली आहे.

गायनात नामवंत गायकांचा सहभाग

चित्रपटातील गाण्यांना अनेक नामवंत गायकांचा आवाज लाभला आहे. वैशाली सामंत, वैशाली माडे, रोहित राऊत, रवींद्र खोमणे, वैशाली इंगवले, वैष्णवी अदोडे आणि आकाश नवगिरे यांनी चित्रपटातील गाणी गायली आहेत. त्यामुळे चित्रपटात लोकसंगीताचा आणि पारंपरिक शैलीचा सुंदर संगम पाहायला मिळणार आहे.

नव्या दमाच्या कलाकारांची फळी

या चित्रपटात प्रियांतिका, आरोही गडदे, मंजुषा खेत्री, संतोष शिंदे, देवा गाडेकर, रविकिरण जावीर, सनी कदम, छाया आदट आणि शरद लांडगे या नव्या दमाच्या कलाकारांचा अभिनय पाहायला मिळणार आहे. विशेष म्हणजे या चित्रपटाचे चित्रीकरण आणि चित्रपटाची टीम ही सांगली जिल्ह्यातील आटपाडी गावातील असून हा त्यांचा पहिलाच चित्रपट आहे. त्यामुळे स्थानिक कलाकार आणि तंत्रज्ञांच्या सहभागामुळे चित्रपटाला अस्सल ग्रामीण रंग मिळाला आहे.

मुरळी परंपरेतील स्त्रीच्या संघर्षाची कहाणी

‘फुला’ ही कथा एका मुरळीच्या पोटी जन्मलेल्या निरागस मुलीच्या आयुष्याभोवती फिरते. तमाशा फड, जागरण-गोंधळ यांसारख्या पारंपरिक लोककला आणि संस्कृतीच्या पार्श्वभूमीवर ही गोष्ट उलगडते. या परंपरेत अडकलेल्या स्त्री कलाकारांच्या आयुष्यातील संघर्ष, वेदना आणि समाजातील त्यांची स्थिती यांचे वास्तव चित्रण या चित्रपटातून करण्यात आले आहे.

लोककलेच्या माध्यमातून वास्तव मांडण्याचा प्रयत्न

चित्रपटाबद्दल बोलताना दिग्दर्शक अभिषेक जावीर यांनी सांगितले की, ‘फुला’ हा केवळ एका मुलीची शोकांतिका नाही, तर महाराष्ट्राच्या लोकपरंपरांमध्ये अडकलेल्या स्त्री कलाकारांच्या अस्तित्वाचा जिवंत दस्तावेज आहे. मुरळी परंपरेत अनेक स्त्रियांना त्यांची स्वप्ने, हक्क आणि सन्मानाने जगण्याची संधी मिळत नाही. समाज त्यांच्या कलेचा आनंद घेतो, मात्र त्यांना माणूस म्हणून जगण्याचा अधिकार देत नाही. या वास्तवाचे प्रामाणिक चित्रण करण्याचा प्रयत्न या चित्रपटातून करण्यात आला आहे.

१७ एप्रिलपासून चित्रपटगृहात

लोकपरंपरा, संघर्ष आणि स्त्रीच्या अस्तित्वाचा प्रश्न मांडणारा ‘फुला’ हा चित्रपट १७ एप्रिलपासून संपूर्ण महाराष्ट्रातील चित्रपटगृहात प्रदर्शित होणार आहे. ग्रामीण संस्कृतीचा आणि वास्तवाचा वेगळा पैलू उलगडणारा हा चित्रपट प्रेक्षकांना एक विचार करायला लावणारा अनुभव देईल.

मराठी चित्रपटसृष्टीत वेगवेगळ्या विषयांवर आधारित चित्रपट प्रेक्षकांना पाहायला मिळत असतात. आता उन्हाळ्याच्या सुट्टीत प्रेक्षकांना हलक्याफुलक्या मनोरंजनाची मेजवानी देण्यासाठी ‘पिक्चर बॉईज’ हा नवा चित्रपट येत आहे. चित्रपटात हिरो बनण्याचं स्वप्न पाहणाऱ्या आणि त्यासाठी धडपड करणाऱ्या काही तरुणांची कथा विनोदी आणि मनोरंजक पद्धतीने मांडण्यात आली आहे. त्यामुळे कॉमेडीचा भरपूर डोस देणारा हा चित्रपट १५ मे पासून संपूर्ण महाराष्ट्रात प्रदर्शित होणार आहे.

दमदार पोस्टर सोशल मीडियावर लाँच

चित्रपटाचं दमदार पोस्टर नुकतंच सोशल मीडियावर लाँच करण्यात आलं असून, त्याला प्रेक्षकांकडून उत्स्फूर्त प्रतिसाद मिळत आहे. पोस्टरमधूनच चित्रपटाची तरुणाईला भावणारी शैली आणि विनोदी अंदाज स्पष्ट दिसून येतो. त्यामुळे ‘पिक्चर बॉईज’ बद्दल प्रेक्षकांमध्ये उत्सुकता निर्माण झाली आहे.

निर्मिती आणि दिग्दर्शनाची जबाबदारी अनुभवी टीमकडे

त्रिमूर्ती फिल्म्सच्या बॅनरखाली या चित्रपटाची निर्मिती करण्यात आली आहे. रवी पांडुरंग पंडितपवार आणि राजा पांडुरंग पंडितपवार हे चित्रपटाचे निर्माते असून शिवाजी केशव पाटील सहनिर्माते आहेत. चित्रपटाची कथा, पटकथा, संवादलेखन आणि दिग्दर्शनाची धुरा निलेशसिंग राजपूत यांनी सांभाळली आहे. त्यामुळे चित्रपटात विनोदासोबतच वास्तववादी कथा मांडण्याचा प्रयत्न करण्यात आला आहे.

संगीत आणि गायनाची खास मेजवानी

चित्रपटातील गाण्यांनाही तितकंच महत्त्व देण्यात आलं आहे. मंदार चोळकर, सुनील दोडगे आणि संध्या–प्रनिकेत यांनी गीतलेखन केलं असून, या गीतांना वरुण लिखाते आणि संध्या–प्रनिकेत यांनी संगीतबद्ध केलं आहे. तर सुप्रसिद्ध गायक आनंद शिंदे, जसराज जोशी, स्वप्नील गोडबोले, वरुण लिखाते आणि एल. के. लक्ष्मीकांत यांनी या चित्रपटातील गाणी गायली आहेत. त्यामुळे संगीताच्या माध्यमातूनही चित्रपट प्रेक्षकांचे मनोरंजन करणार आहे.

छायांकन आणि संकलनाची जबाबदारी

चित्रपटाचं छायांकन विनोद पाटील यांनी केलं असून, संकलनाची जबाबदारी रोहन पाटील यांनी सांभाळली आहे. त्यामुळे चित्रपटाच्या दृश्यरचनेत आणि गतीत विशेष लक्ष देण्यात आलं आहे.

तरुण कलाकारांची दमदार फळी

‘पिक्चर बॉईज’ या चित्रपटात प्रतीक लाड, हंसराज जगताप, अरबाज शेख आणि घनश्याम दरवडे (छोटा पुढारी) यांच्या मध्यवर्ती भूमिका आहेत. यांच्यासोबतच अनेक नव्या-जुन्या कलाकारांची फळी या चित्रपटात पाहायला मिळणार आहे. चित्रपटात हिरो बनण्याचं स्वप्न पाहणाऱ्या तरुणांच्या संघर्षाची आणि त्यांच्या आयुष्यात घडणाऱ्या मजेशीर प्रसंगांची कथा प्रेक्षकांना अनुभवायला मिळणार आहे.

उन्हाळ्याच्या सुट्टीत मनोरंजनाची हमी

चित्रपटातूनच चित्रपटाची गोष्ट सांगण्याचा प्रकार यापूर्वी अनेकदा पाहायला मिळाला आहे. मात्र हिरो बनण्यासाठी झटणाऱ्या तरुणांची कथा विनोदी आणि मनोरंजक शैलीत मांडण्याचा प्रयत्न ‘पिक्चर बॉईज’ या चित्रपटातून करण्यात आला आहे. त्यामुळे उन्हाळ्याच्या सुट्टीत प्रेक्षकांना हसवणारा आणि हलकंफुलकं मनोरंजन देणारा हा चित्रपट चित्रपटगृहात जाऊन पाहणं प्रेक्षकांसाठी निश्चितच पर्वणी ठरणार आहे.