वर्षाचा पहिला सण ‘मकरसंक्रांत’ जवळ आला आहे. तीळगुळाचा खमंग सुगंध हवेत पसरला आहे, बाजारात विविध रंगांचे पतंग, सजावटीच्या वस्तू आणि हलव्याचे दागिने पाहायला मिळतायत. सण म्हंटल की त्याच्या आठवणी आणि त्याला साजरा करण्याचा उत्साह सगळ्यांमध्ये असतो आणि कलाकार काही वेगळे नाही. झी मराठीच्या कलाकारांनी मकरसंक्रांत निमित्ताने त्यांच्या भावना व्यक्त केल्या.

‘सारं काही तिच्यासाठी’ मालिकेतील उमा म्हणजेच खुशबू तावडे ने सांगितले, “खूप खास आहे ही मकरसंक्रांत आमच्यासाठी कारण नवीन घरात पहिला सण आणि वर्षाचा ही पहिला सण आहे. नवीन घरात मार्गशीर्षातल्या गुरुवारी स्थलांतर केले. हंगाम बदलतो त्यासोबत खाण्या-पिण्याच्या सवयी ही बदलतात. तीळ आणि गुळाचा खाण्यात समावेश होतो. ह्या काळात मी काळे कपडे परिधान करते जसे मकरसंक्रांतीच्या दिवशी सगळे काळे कपडे घालतात कारण त्याने उब मिळते. हळदी-कुंकू माझ्या सासरी म्हणजे सायनला होतं, एकदम पारंपरिक पद्धतींनी साजरा केली जाते मकरसंक्रांत. माझा मुलगा राघव थोडं बोलायला लागला आहे तर त्याच्या तोंडातून तिळगुळ घ्या गोड गोड बोला हे ऐकण्याचं कुतहूल आहे मला.”

‘सातव्या मुलीची सातवी मुलगी’ मधली नेत्रा आणि महाराष्ट्राची लाडकी तितिक्षा तावडे म्हणते, मकरसंक्रांत मी कुटुंबासोबत साजरी करते. माझी लहानपणाची आठवण आहे जेव्हा मी, खुशबू, आई आणि बाबा आम्ही एकत्र बसून तिळगुळाचे लाडू बनवायचो. मला लक्षात आहे मला ते नीट बनवायला जमायचे नाही आणि सारण गरम असल्यामुळे ते लाडू माझ्या हातात फुटायचे. गेले काही वर्षापासून मी उत्तम तीळ गुळाचे लाडू बनवते. आई- बाबा दुकान बंद करून उशिरा रात्री परतयायचे पण एकत्र बसून लाडू बनवायचा कार्यक्रम दरवर्षीचा ठरलेला होता. मला तिळगुळाचे लाडू प्रचंड आवडतात मी एका खेपेत डब्बा भरून लाडू संपवायचे. ह्या थंडीच्या ऋतूत तिळाच्या लाडवाचे फायदे ही आहे ते आपल्या शरीराला उब देतात. ह्या वर्षी सुद्धा आई-बाबां सोबत सण साजरा करायचा हाच बेत आहे. मी कधी पतंग उडवले नाही पण खुशबू जेव्हा गुजरातला शिकत होती तेव्हा तिने पतंग उडवले आहेत आणि पतंग उडवण्या मागचं ही कारण आहे की तुमच्या शरीराला सूर्याची उष्णता मिळाली पाहिजे. तुम्हा सर्वांना आमच्या कडून मकर संक्रांतीच्या हार्दिक शुभेच्छा! “तिळगुळ घ्या गोड गोड बोला आणि बघायला विसरू नका

‘सारं काही तिच्यासाठीची’ निशी म्हणजेच दक्षता जोईल म्हणते, “मला लहानपणी आई- बाबानी संक्रांतीचं महत्व समजावलं होत आणि तेव्हा पासून मला ह्या सणाची उत्सुकता होती. तर मला सर्वांना हा सण साजरा करण्यामागचं कारण सांगायला खूप आवडेल. मकरसंक्रांतला सूर्य मकर राशीत प्रवेश करतो ज्योतिष शाश्त्रानुसार आणि ह्या सणाच्या दिवशी जे पदार्थ आपण बनवतो, खातो ते ह्या हंगामामध्ये पिकतात म्हणजे मका, शेंगदाणे, लाह्या इत्यादी गोष्टी. हे एक मनोरंजक तथ्य आहे हा सण साजरा करण्यामागचं. ह्या सणाला काळे कपडे घालण्या मागचं कारण हे आहे की काळे कपडे हिवाळ्यात उब देतात. माझी मकरसंक्रांतची आठवण सांगायची झाली तर हळदी कुंकूला मिळणारे घरचे नरम तीळगुळाचे लाडू आणि वाण जे आईला मिळतात, आणि ते मिळालेलं वाण जर माझ्या उपयोगाचं असेल तर ते माझे होऊन जातं. ह्या वर्षीही मी वाट पाहत आहे हळदी कुंकूंचे आणि तिळगुळांचे.”

‘अप्पी आमची कलेक्टर’ मधली अप्पी म्हणजे शिवानी नाईक म्हणते, ” मकरसंक्रातीच्या खूप साऱ्या आठवणी आहेत. मागचे २-३ वर्ष मी अहमदनगर मध्ये मी संक्रांत साजरी करत होते, कारण अहमदनगर महाकरंडक स्पर्धेचा शेवटचा दिवस असायचा हा. वर्षाचा पहिला सण आणि तो ही नाटकाच्या ग्रुप सोबत साजरा करण्याचा उत्साह वेगळाच असतो. एका कलाकारालासाठी ह्याऊन आनंदाची गोष्ट काय असू शकते. पण जेव्हा मी घरी असते तेव्हा आम्ही पतंग उडवतो सर्व एकत्र मिळून, गोडाचं खातो जे ह्या हंगामात आपल्या शरीराला उष्णता देतात जसं तिळाचे आणि गुळाचे पदार्थ त्या सोबत सगळ्यांशी गाठीभेटी होतात. पण ह्या वर्षी हा सण ‘अप्पी आमची कलेक्टरच्या’ सेट वर शूटिंग करत साजरा केला जाणार आहे.

‘सातव्या मुलीची सातवी मुलगी’ मध्ये विरोचकाची भूमिका साकारणाऱ्या सुरुची अडारकर ची लग्नानंतरची ही पहिली मकरसंक्रांत आहे आणि सुरुचीने आपला आनंद व्यक्त करताना सांगितले, “माझ्यासाठी खूप खास दिवस आहे हा कारण लग्नानंतरचा माझा हा पहिला सण आहे. पण मी आणि पियुष आम्ही दोघेही शूटिंग मध्ये व्यस्त आहोत. मला लक्षात आहे की मी माहेरी होती तेव्हा हळदी-कुंकू समारंभाची एक वेगळीच मज्जा असायची. आमच्याकडे लग्नानंतर पहिला सण साजरा नाही करत पण तिळगुळ खाणे आणि इतर गोष्टीचा आम्ही नक्की आनंद घेणार आहोत.”

झी मराठीवर बघायला विसरू नका ‘सातव्या मुलीची सातवी मुलगी’ रात्री १०:३० वा., ‘सारं काही तिच्यासाठी’ संध्या ७:३० वा. आणि ‘अप्पी आमची कलेक्टर’ संध्या ७ वा.

निझामाच्या क्रूर रझाकारांपासून मराठवाड्याच्या मुक्तिसाठी लढा देणाऱ्या शूरवीर स्वातंत्र्ययोद्ध्यांच्या धगधगत्या संघर्षाबरोबरच मराठवाड्याच्या मातीचा झळाळता गौरवास्पद इतिहास मांडणारा नाट्य माहितीपट आशियाई चित्रपट महोत्सवात सादर केला जाणार आहे.

सांस्कृतिक कार्य विभाग, महाराष्ट्र शासन आणि महाराष्ट्र चित्रपट, रंगभूमी आणि सांस्कृतिक विकास महामंडळाची निर्मिती असलेल्या या नाट्य माहितीपटाचे खास स्क्रिनिंग शनिवारी १३ जानेवारी रोजी, दुपारी १२ वाजता माहिम येथील सिटीलाईट सिनेमा येथे करण्यात येणार आहे. त्यानिमित्ताने मराठवाड्याचा मुक्तिसंग्राम प्रथमच मोठ्या पडद्यावर झळकणार आहे.

राज्याचे सांस्कृतिक कार्य मंत्री सुधीर मुनगंटीवार यांच्या संकल्पनेतून साकार झालेल्या `मुक्तिसंग्राम: कथा मराठवाड्याच्या संघर्षाची’ या नाट्य माहितीपटाची निर्मिती सांस्कृतिक कार्य विभाग, महाराष्ट्र शासन आणि महाराष्ट्र चित्रपट, रंगभूमी आणि सांस्कृतिक विकास महामंडळाने केली आहे. तर प्रसिद्ध दिग्दर्शक दिग्पाल लांजेकर यांनी या माहितीपटाचे दिग्दर्शन केले आहे. अजय पुरकर, समीर धर्माधिकारी, आदिनाथ कोठारे, समीर विद्वांस विक्रम गायकवाड, स्मिता शेवाळे अशा मराठी चित्रपटसृष्टीतील मान्यवर कलाकारांनी या माहितीपटात भूमिका साकारली आहे.

सिलेक्टेड करस्पॉन्डन्स ऑफ सरदार वल्लभभाई पटेल, हैद्राबादचा स्वातंत्र्यसंग्राम आणि मराठवाडा आदी पुस्तकांचा संदर्भ घेत माहितीपटाची संहिता लिहीण्यात आली आहे. राज्याच्या सांस्कृतिक विभागाचे प्रधान सचिव विकास खारगे, महामंडळाचे व्यवस्थापकीय संचालक डॉ. अविनाश ढाकणे यांच्या मार्गदर्शनाखाली मराठवाडा मुक्तीसंग्रामाचा इतिहास मोठ्या पडद्यावर प्रथमच येत आहे. या नाट्य माहितीपटातून नव्या पिढीला प्रेरणा मिळेल, असा विश्वास डॉ. ढाकणे यांनी व्यक्त केला.

पुष्कर जोग दिग्दर्शित ‘मुसाफिरा’ चित्रपटाचे नवीन पोस्टर नुकतेच झळकले असतानाच आता या चित्रपटातील मनाला भिडणारे असे गाणे प्रदर्शित झाले आहे. जगण्याला नवे पंख देऊन पुन्हा भरारी घ्यायला लावणाऱ्या या फ्रेश गाण्याचे ‘मन बेभान’ असे बोल असून या सुंदर गाण्याला सुहित अभ्यंकर यांचा आवाज आणि श्रवणीय संगीत लाभले आहे. तर मनाला स्पर्श करणाऱ्या या गाण्याचे बोल मंदार चोळकर यांनी लिहिले आहेत. हे गाणे पूजा सावंत आणि चेतन मोहतुरे यांच्यावर चित्रित करण्यात आले आहे.

या गाण्याबद्दल गायक सुहित अभ्यंकर म्हणतात, ” या गाण्याचे बोल अतिशय हृदयस्पर्शी आहेत. कधी कधी आयुष्यात आलेली मरगळ दूर करण्यासाठी हे गाणे नक्कीच स्फूर्तिदायी ठरेल. आयुष्याचा अर्थ सांगणारे, स्वप्नांचा मागोवा घेणारे हे गाणे आहे. त्यामुळे या गाण्याचे संगीत तसेच उत्साहाने भरलेले असणे आवश्यक होते आणि मला आनंद आहे की, अपेक्षित असे संगीत मला या गाण्यासाठी देता आले. हे गाणे ऐकायला जितके छान वाटते, तितकेच त्याचे सादरीकरणही उत्कृष्ट आहे.”

दिग्दर्शक पुष्कर जोग म्हणतात, ” कोणत्याही चित्रपटातील गाणे हे त्याचा आत्मा असतो. संगीतातून अनेक भावना व्यक्त केल्या जातात. सोडूनी कालचे आज जगताना, तू नवा रंग दे आज स्वप्नांना, जीवनाला उद्देशून असणारे हे गाणे बरंच काही सांगत आहे.”

शेतकरी राजाची मातीशी असणारी घट्ट नाळ, त्याच मातीतून पीक उगवण्याची तळमळ आणि त्याच शेतीमुळे त्याचं न जमणारं लग्न… याच विषयाला हात घालणारा चित्रपट ‘नवरदेव (Bsc Agri)’ २६ जानेवारीला प्रदर्शित होतोय. नुकतेच या चित्रपटाचे ट्रेलर प्रदर्शित झाले. या दमदार ट्रेलरला प्रेक्षकांचा प्रतिसादही दमदारच मिळतोय.

तरूण शेतकऱ्याच्या भूमिकेतील क्षितीश दाते पहिल्यांदाच प्रमुख भूमिकेत झळकणार आहे. तर त्याच्या साथीला प्रियदर्शिनी इंदलकर, नवरी म्हणून त्याला मिळणार की नाही, हे चित्रपटगृहात जाऊनच बघावं लागेल!

बी. एस. सी. अॅग्री केलेल्या महत्त्वाकांक्षी राजवर्धनला लग्नासाठी कोणकोणत्या अडचणींना सामोरं जावं लागतं, त्याला नवरी मिळते की नाही, याची कथा या चित्रपटातून बघायला मिळणार आहे.

आपला अन्नदाता म्हणजेच शेतकरी, तंत्रज्ञानाने कितीही विकसित झाला, कितीही प्रगत शेती केली, तरीही आज त्याला लग्नासाठी मुलगी मिळणं अवघड झालंय. चित्रपटातील तरूण शेतकरी गावकऱ्यांना एकत्र करुन प्रगत शेती करतोय, जिद्दीने लढायला शिकवतोय. मात्र, असे असूनही नवरीचे आई-वडिल नोकरदार मुलांनाच आपल्या मुली देऊ इच्छितात. या सगळ्या अडचणींवर मात करत, शेतकरी राजवर्धन नवरीच्या मनात मळा फुलवणार का हे थिएटरमध्ये जाऊनच बघावं लागेल!

दिग्दर्शक राम खाटमोडे यांनी अगदी योग्य पद्धतीने भाष्य करत हा विषय किती महत्त्वाचा आहे हे दाखवून दिले आहे. तर काही दिवसांपूर्वी रिलीज झालेलं या चित्रपटातील ‘लाल चिखल’ हे रॅप नेटकऱ्यांनी डोक्यावर घेतलं! याचे शब्द आणि लय ही मनाला पिळवटून टाकणारी आहे.

अभिनेता क्षितीश दाते या चित्रपटात तरूण शेतकऱ्याच्या भूमिकेत दिसेल, त्यासोबतच प्रविण तरडे, प्रियदर्शिनी इंदलकर, मकरंद अनासपुरे, गार्गी फुले, रमेश परदेशी, हार्दिक जोशी, नेहा शितोळे, संदीप पाठक, तानाजी गळगुंडे, विनोद वणवे अशा उत्तम कलाकारांची मांदियाळी या चित्रपटात पाहायला मिळेल. एका गंभीर सामाजिक प्रश्नाला हलक्या-फुलक्या पद्धतीत प्रेक्षकांसमोर ठेवण्याचे काम या चित्रपटाची टीम करत आहे.

आर्यन्स एज्युटेन्मेंट प्रस्तुत, मिलिंद लडगे निर्मित आणि राम खाटमोडे लिखित दिग्दर्शित नवरदेव या चित्रपटाचे क्रिएटीव्ह दिग्दर्शक विनोद वणवे हे आहेत, तर विनोद सातव हे क्रिएटीव्ह हेड आहेत. हा चित्रपट २६ जानेवारीला महाराष्ट्रभरात प्रदर्शित होईल.

अवयवदान हा अत्यंत गंभीर विषय अतिशय हलक्या फुलक्या पद्धतीनं ८ दोन ७५ : फक्त इच्छाशक्ती हवी! या चित्रपटातून मांडण्यात आला आहे. चित्रपटसृष्टीत उत्सुकता निर्माण केलेला हा चित्रपट १९ जानेवारीला प्रदर्शित होणार असून, या चित्रपटाचा ट्रेलर नुकताच लाँच करण्यात आला. “८ दोन ७५” म्हणजे नक्की काय? हे या चित्रपटाचा ट्रेलर पाहिल्यावर आपल्या लक्षात येईल.

उदाहरणार्थ निर्मित या निर्मिती संस्थेचे विकास हांडे, लोकेश मांगडे आणि सुधीर कोलते यांनी ८ दोन ७५ : फक्त इच्छाशक्ती हवी! या चित्रपटाची निर्माती केली आहे, तर सुश्रुत भागवत यांनी हा चित्रपट दिग्दर्शित केला आहे. शर्वाणी – सुश्रुत यांनी चित्रपटाच्या पटकथा लेखनाची, तर संजय मोने यांनी संवाद लेखनाची जबाबदारी निभावली आहे. अभिनेता शुभंकर तावडे, अभिनेत्री संस्कृती बालगुडे यांच्यासह शर्वाणी पिल्लई, संजय मोने, आनंद इंगळे, राधिका हर्षे – विद्यासागर, अश्विनी कुलकर्णी, विजय पटवर्धन, चिन्मय संत, डॉ .निखिल राजेशिर्के, सीमा कुलकर्णी पुष्कर श्रोत्री यांच्या चित्रपटात भूमिका आहेत. वैभव जोशी यांनी गीतलेखन, अवधूत गुप्ते यांनी संगीत दिग्दर्शन केलं आहे. अनेक चित्रपट महोत्सवांमध्ये ९० पेक्षाही अधिक पुरस्कार या चित्रपटानं मिळवले आहेत.

“८ दोन ७५” : फक्त इच्छाशक्ती हवी! हा चित्रपट देहदानासारख्या महत्त्वाच्या विषयावर बेतला आहे. देहदान केल्यास मृत्यूनंतर आपले अवयव अन्य गरजू रुग्णांच्या कामी येऊ शकतात हा विचार चित्रपटात अतिशय रंजक पद्धतीनं मांडल्याचे चित्रपटाच्या ट्रेलरमधून दिसतं. त्याशिवाय वैद्यकीय शिक्षणावरही या चित्रपटातून भाष्य करण्यात आलं आहे. त्यामुळे उत्तम स्टारकास्ट असलेला, महत्त्वाचा विषय मनोरंजक पद्धतीनं मांडणारा “८ दोन ७५”: फक्त इच्छाशक्ती हवी! हा चित्रपट आता १९ जानेवारीला चित्रपटगृहात पाहता येईल.

Trailer Link

https://youtu.be/Sm4gFXa24S0?si=a1lJeeaJ3aNRKO5B