Home – Batamiwala News

May 10, 2024

महाराष्ट्रभूषण अशोक सराफ दिसणार ‘लाईफ लाईन’ सिनेमात

जुने रितीरिवाज आणि आधुनिक विज्ञान यांच्यातील संघर्षावर भाष्य करणारा ‘ लाईफ लाईन ‘

क्रिसेंडो एन्टरटेनमेंट निर्मित, ११ आंतरराष्ट्रीय पुरस्कार प्राप्त ‘ लाईफ लाईन ‘ ह्या आगामी मराठी चित्रपटाची नुकतीच सोशल मीडिया वरून घोषणा करण्यात आली असून पोस्टर ची झलक आणि शीर्षक पाहता विषयाची उत्सुकता निर्माण होते ह्यात शंकाच नाही.

कलाकार कोण?

आधुनिक विज्ञान आणि जुन्या रीतिरिवाजांचा संघर्ष अशी संकल्पना असणाऱ्या ह्या चित्रपटात लोकप्रिय अभिनेते माधव अभ्यंकर आणि महाराष्ट्रभूषण पुरस्कार प्राप्त महानायक अशोक सराफ प्रमुख भूमिकेत दिसणार आहेत. सोबतीला हेमांगी कवी, भरत दाभोळकर, जयवंत वाडकर, शर्मिला शिंदे, संध्या कुटे आणि समीरा गुजर अशी तगड्या कलाकारांची फौज आहे. साहिल शिरवैकर दिग्दर्शित ‘ लाईफ लाईन ‘ ह्या चित्रपटाची कथा, पटकथा, संवाद आणि गीत राजेश शिरवैकर यांचे आहेत. अशोक पत्की ह्यांनी संगीतबद्ध केलेल्या गीतांना अवधूत गुप्ते आणि माधुरी करमरकर ह्यांचा आवाज लाभला आहे तर लालजी जोशी, कविता शिरवैकर, मिलिंद प्रभुदेसाई, संध्या कुलकर्णी, अमी भुता, संचीता शिरवैकर, उदय पंडीत, शिल्पा मुडबिद्री ‘लाईफ लाईन’ चे निर्माते आहेत. लवकरच हा चित्रपट प्रेक्षकांच्या भेटीला येणार आहे.

‘लाईफ लाईन’ चे तरुण दिग्दर्शक साहिल शिरवैकर म्हणतात, ” सामाजिक भान आणि व्यावसायिक मूल्यं राखून हा चित्रपट आम्ही बनवलेला आहे. विधात्याने रेखाटलेली तळहातावरची ‘आयुष्य रेखा’ आपण वाढवू शकतो का? ह्या प्रश्नाचं उत्तर शोधण्याचा प्रयत्न आम्ही ह्या चित्रपटातून केलेला आहे. अनोखी कथा, अनोखा संघर्ष, अनोखी मांडणी, अनोखी पात्रनिवड आणि तगड्या कलाकारांच्या अभिनयाची जुगलबंदी ही ह्या चित्रपटाची वैशिष्ट्यं म्हणता येतील. बाकी अशोक सराफ सर चित्रपटांच्या निवडीबाबत किती चोखंदळ असतात हे सर्वांना माहीत आहेच. त्यांनी आमचा चित्रपट स्विकारला म्हणजे विषय संपला.
May 10, 2024

मुंबई लोकल” चित्रपटाचे पोस्टर सिद्धिविनायक चरणी लॉन्च

लोकल रेल्वेमध्ये घडणारी एक मनोरंजक कहाणी

अभिनेता प्रथमेश परब आणि अभिनेत्री ज्ञानदा रामतीर्थकर पहिल्यांदाच एकत्र आले आहेत. मुंबई लोकल या चित्रपटात प्रथमेश आणि ज्ञानदाची जोडी दिसणार असून, या नव्या जोडीविषयी चित्रपटसृष्टीत उत्सुकता निर्माण झाली आहे. अक्षय्य तृतीयेच्या मुहूर्तावर चित्रपटाच्या टीमने सिद्धिविनायक चरणी दर्शन घेऊन या चित्रपटाची घोषणा केली.

टाइमपास, टकाटक, बालक पालक अशा अनेक चित्रपटांतून अभिनेता प्रथमेश परबनं आपल्या अभिनयाचं नाणं खणखणीत वाजवलं आहे. विनोदी भूमिकांसह त्याच्यातील गंभीर अभिनेत्याचं दर्शन प्रेक्षकांना घडवलं आहे. त्यामुळे प्रथमेश परब हा नव्या पिढीतला लोकप्रिय अभिनेता ठरला आहे. तर ज्ञानदा रामतीर्थकरनं प्रामुख्यानं टीव्ही मालिकांमध्ये अभिनय केला आहे. ज्ञानदाच्या सख्या रे, जिंदगी नॉट आऊट, शतदा प्रेम करावे, ठिपक्यांची रांगोळी अशा मालिका गाजल्या आहेत. त्याशिवाय धुरळासारखे काही चित्रपटही तिनं केले आहेत. या दोघांसोबत महाराष्ट्राची हास्यजत्रा कार्यक्रमातील लोकप्रिय अभिनेता पृथ्वीक प्रताप देखील या चित्रपटात महत्वाच्या भूमिकेत दिसणार आहे.

बिग ब्रेन प्रॉडक्शन्सचे निलेश राठी यांनी “मुंबई लोकल” या चित्रपटाची निर्मिती केली आहे. प्राची राऊत, सचिन अगरवाल सहनिर्माते असलेल्या या चित्रपटाचं दिग्दर्शन अभिजित करणार आहेत. या चित्रपटात प्रथमेश परब आणि ज्ञानदा रामतीर्थकर ही जोडी पहिल्यांदाच एकत्र आली असून मनमीत पेम, पृथ्वीक प्रताप, वनिता खरात, अभिजीत चव्हाण, अनिकेत केळकर, संजय खापरे, संजय कुलकर्णी, स्मिता डोंगरे आदी कलाकारही आपल्याला या चित्रपटातून भेटीस येणार आहेत. चित्रपटाचे छायांकन योगेश कोळी करणार असून संकलन स्वप्निल जाधव यांचे आहे. क्रिएटिव्ह प्रोडूसर आणि सह दिग्दर्शक विनोद शिंदे असून कलादिग्दर्शक म्हणून सुमित पाटील पाहणार आहेत. कार्यकारी निर्माता नीलेश गुंडाळे तर रश्मी राठी कपडेपट पाहणार आहेत. संगीतकार म्हणून देव आशिष आणि हर्षवर्धन वावरे काम पाहत आहेत.

मुंबईची जीवनवाहिनी असलेल्या लोकल रेल्वेमध्ये घडणारी एक मनोरंजक कहाणी या चित्रपटात मांडण्यात आली आहे.
May 10, 2024

दिवाळीच्या मुहूर्तावर प्रेक्षक होणार मालामाल.. येतोय “ये रे ये रे पैसा ३

चित्रपट १ नोव्हेंबरला होणार प्रदर्शित

मॅड कॉमेडी असलेल्या ये रे ये रे पैसा चित्रपटाला प्रेक्षकांचा उत्तम प्रतिसाद लाभला होता. त्यानंतर “ये रे ये रे पैसा २” या नावानं आलेल्या या चित्रपटाच्या सिक्वेललाही प्रेक्षकांनी डोक्यावर घेतलं होतं. आता दिग्दर्शक संजय जाधव “ये रे ये रे पैसा ३” प्रेक्षकांसाठी घेऊन येत आहेत. येत्या दिवाळीमध्ये १ नोव्हेंबरपासून पुन्हा एकदा मॅड कॉमेडी आणि धावपळीची धमाल रसिक प्रेक्षकांना अनुभवता येणार आहे. नुकतेच या चित्रपटाचे पोस्टर सोशल मीडियावर लॉन्च करण्यात आले आहे.

अमेय विनोद खोपकर एलएलपी, उदाहरणार्थ निर्मित आणि न्युक्लिअर अॅरो पिक्चर्स या निर्मिती संस्थांचे सुधीर कोलते, ओंकार सुषमा माने, स्वाती खोपकर, कुमार मंगत पाठक, ओमप्रकाश भट्ट, नासिर शरीफ यांनी “ये रे ये रे पैसा ३” या चित्रपटाची निर्मिती केली आहे तर निनाद नंदकुमार बत्तीन सहनिर्माते आहेत. चित्रपटाची कथा व दिग्दर्शन संजय जाधव यांचे आहे. चित्रपटाची पटकथा सुजय जाधव यांचीच आहे, तर संवाद लेखन अरविंद जगताप यांनी केलं आहे.

कोणते कलाकार दिसणार?

चित्रपटात संजय नार्वेकर, सिद्धार्थ जाधव, विशाखा सुभेदार, उमेश कामत, तेजस्विनी पंडित, आनंद इंगळे, नागेश भोसले अशी तगडी स्टारकास्ट पाहायला मिळणार आहे.

पैसा मिळवण्यासाठीची धडपड आणि त्यातून होणारे गोंधळ या पूर्वीच्या दोन्ही चित्रपटात पाहायला मिळाले होते. या दोन्ही चित्रपटांचा प्रेक्षकांची तुफान प्रतिसाद दिला होता. त्यामुळे आता “ये रे ये रे पैसा ३” मध्ये आणखी काय वेगळी कथा दाखवली जाणार याची उत्सुकता आहे. उत्तम अभिनेते या चित्रपटात असल्यानं हा चित्रपट प्रेक्षकांचं पुरेपूर मनोरंजन करणार यात काहीच शंका नाही.
May 9, 2024

२१ जूनला ‘गाभ’ रुपेरी पडद्यावर

सर्वसामान्यांच्या जगण्याचा वेध घेणाऱ्या मराठी चित्रपटांना नेहमीच चांगला प्रतिसाद मिळत आला आहे. समाजातील वास्तव मांडणारे सिनेमे मनोरंजनासोबतच कटू सत्य सादर करण्याचंही काम करीत असतात. वेगवेगळ्या चित्रपट महोत्सवांतून नावाजल्या गेलेल्या ‘गाभ’ चित्रपटाच्या निमित्ताने एक वेगळा विषय मराठी रुपेरी पडद्यावर २१ जूनला येत आहे. ‘गाभ’ चित्रपटाची संकल्पना, लेखन आणि दिग्दर्शन अनुप जत्राटकर यांचे आहे. सुमन नारायण गोटुरे आणि मंगेश नारायण गोटुरे या चित्रपटाचे निर्माते आहेत. सहनिर्माते अनुप जत्राटकर आहेत.

मनुष्य आणि प्राणी यांना केंद्रस्थानी ठेवून ‘गाभ’ चित्रपटाची कथा मांडली आहे. ही कथा एका मानसिकतेचं प्रतिनिधित्व करते. या मानसिकतेचं प्रतिनिधित्व करणारी भूमिका अभिनेता कैलास वाघमारे यांनी आपल्या ‘दादू’ या पात्रातून साकारली आहे. स्वत:च्या म्हशीसाठी एका रेड्याचा शोध घेताना माणूस म्हणून होणारा बदल आणि त्या बदलाची कथा हळव्या प्रेमाच्या माध्यमातून दाखवणारा गावच्या रांगड्या मातीतला ‘गाभ’ चित्रपट आहे.

‘गाभ’ चित्रपटात कैलास वाघमारे, सायली बांदकर, विकास पाटील, उमेश बोळके, वसुंधरा पोखरणकर, श्रद्धा पवार, चंद्रशेखर जनवाडे यांच्या भूमिका आहेत. छायाचित्रण वीरधवल पाटील यांचे तर संकलन रविंद्र चांदेकर यांचे आहे. गीते आणि संगीत, आणि साउंड डिझाइनची जबाबदारी चंद्रशेखर जनवाडे यांनी सांभाळली असून पार्श्वसंगीत रविंद्र चांदेकर यांचे आहे. आनंद शिंदे, प्रसन्नजीत कोसंबी, सावनी रविंद्र यांचा स्वरसाज चित्रपटातील गाण्यांना लाभला आहे. रंगभूषा विजय ढेरे, वेशभूषा चैताली गानू, केशभूषा रामेश्वरी, मोहिनी चव्हाण यांची आहे. व्हीएफक्स माधव चांदेकर तर कलादिग्दर्शनाची जबाबदारी कै.सुंदर कुमार यांनी सांभाळली आहे. प्रोडक्शन मॅनेजर रंगराव पाटील आहेत.

२१ जूनला ‘गाभ’ चित्रपटगृहात दाखल होणार आहे.
May 9, 2024

मानाचि’ संघटनेचा ९ वा वर्धापनदिन दिमाखात संपन्न

‘हा माझा नाही, माझ्यातल्या सरस्वतीच्या अंशाचा सन्मान ! ’असं ज्येष्ठ नाटककार आदरणीय श्री. सुरेश खरे, आपल्या लेखन कारकीर्द सन्मानाला उत्तर देताना म्हणाले ‘लेखकांनी.. लेखकांची.. लेखकांसाठी..’ स्थापन केलेल्या मालिका नाटक चित्रपट लेखक संघटनेच्या ९ व्या वर्धापन दिनानिमित्त आयोजित ‘लेखक सन्मान संध्या’ सोहळ्यात ते बोलत होते. गतवर्षीचे कारकीर्द सन्मान विजेते ज्येष्ठ नाटककार श्री. गंगाराम गवाणकर, ऍड-गुरू श्री. भरत दाभोळकर, मानाचिचे अध्यक्ष श्री. विवेक आपटे आणि श्री. पुरुषोत्तम बेर्डे यांनी श्री. सुरेश खरे यांचा शाल, श्रीफळ, गुलाबपुष्प व सन्मानचिन्ह देऊन सन्मान केला. हा सोहळा दिनांक ६ मे २०२४ रोजी संध्याकाळी, मुंबईतल्या शिवाजी मंदिर नाट्यगृहात मोठ्या दिमाखात पार पडला. श्री. गंगाराम गवाणकर, सुरेश खरे यांच्या सन्मानार्थ म्हणाले की, ‘माझ्या कारकीर्दीला सुरेश खऱ्यांच्या नाटकाचा बॅकस्टेज वर्कर म्हणून सुरूवात झाली. पुढे सुरेश खरे आणि मी दोघंही नाट्यसंमेलनाचे अध्यक्षही झालो आणि मानाचिच्या लेखन कारकीर्द सन्मानाचे मानकरीही झालो.’

या सन्मान संध्येत, मालिका, नाटक, चित्रपटांच्या प्रशंसनीय लेखनासाठी श्री. राकेश सारंग, श्री.अनिल पवार, सौ. अदिती मारणकर, श्री. कौस्तुभ देशपांडे, श्री. स्वप्निल जाधव, श्री. सचिन जाधव, श्री. क्षितिज पटवर्धन, श्री. नितीन सुपेकर यांचा सन्मान करण्यात आला. त्या बरोबरच अन्य क्षेत्रातल्या प्रशंसनीय लेखनाबद्दल, नाट्यसमीक्षक श्री. रवींद्र पाथरे, गेली पंचवीसहून अधिक वर्ष, ‘अर्थ आणि बँकिंग’ सदर लिहिणारे श्री.राजीव जोशी, गणेशोत्सव देखाव्यांच्या लेखनासाठी श्री.विजय कदम यांनाही सन्मानित करण्यात आलं. मानाचिच्या वाटचालीत उल्लेखनीय कार्य करणाऱ्या श्री. गणेश गारगोटे आणि श्री. उमेश ओमाशे यांचाही सन्मान करण्यात आला. श्री. आशिष पाथरे यांच्या खुसखुशीत निवेदनानं ही सन्मान संध्या रंगली.

त्या पूर्वी, मानाचि लेखक संघटनेनं आयोजित केलेल्या उत्स्फूर्त एकांकिका स्पर्धेच्या अंतिम फेरीतील पाच एकांकिकांचं सादरीकरण झालं. नवीन लेखकांना प्रोत्साहन मिळावं, नवनवीन लेखक लिहिते व्हावेत या उद्देशाने मानाचि गेली नऊ वर्ष विविध शिबिरं, परिसंवाद, आणि मार्गदर्शक चर्चासत्रांचे आयोजन करत आली आहे. त्याच उद्देशाने यंदा उत्स्फूर्त एकांकिका स्पर्धेचं आयोजन करण्यात आलं होतं. महाराष्ट्रभरातून १४ संघांनी या स्पर्धेत भाग घेतला होता.

अंतिम फेरीत संहिता क्रिएशन्स मुंबईच्या, ‘१४ इंचाचा वनवास’ या एकांकिकेने प्रथम क्रमांक पटकावत लेखन, दिग्दर्शन, अभिनेता, संगीत व सर्वोत्कृष्ट कथाविस्तार या पारितोषिकांवर मोहर उमटवली. तर बीएमसीसी पुणे यांनी सादर केलेल्या ‘A tale of Two’ या एकांकिकेने दुसरा क्रमांक पटकावत, लेखन, दिग्दर्शन, प्रकाश योजना, नेपथ्य, रंगभूषा अशी पारितोषिकं पटकावली.

ॲड-गुरु भरत दाभोळकर, लेखक आनंद म्हसवेकर, रामनाथ थरवळ, पुरुषोत्तम बेर्डे, विजय टाकळे, राजीव जोशी, होम मिनिस्टरचे लेखक महेंद्र कदम, मानाचिचे अध्यक्ष विवेक आपटे या मान्यवरांच्या हस्ते पारितोषिके प्रदान करण्यात आली. यातील सर्व रोख पारितोषिके मानाचिच्या सभासदांनी आणि सन्मानचिन्हे पितांबरी प्रॉडक्टस प्रा. लि. नी प्रायोजित केली होती.

श्री.गिरीश ओक, सौ.ईला भाटे, श्री.विश्वास सोहनी, श्री.हेमंत भालेकर व शिल्पा नवलकर यांनी परीक्षक म्हणून जबाबदारी सांभाळली. या वेळी उत्स्फूर्त एकांकिका या नाट्यप्रकारचे जनक श्री. सुहास कामत, आणि ज्येष्ठ रंगकर्मी श्री. प्रकाश बुद्धीसागर व श्री. प्रमोद लिमये यांचा प्रदीर्घ नाट्यसेवेबद्दल कृतज्ञता सत्कार करण्यात आला.

स्पर्धेचा संपूर्ण निकाल पुढीलप्रमाणे,

सर्वोत्कृष्ट एकांकिका प्रथम क्रमांक
(मानाचि आणि रामनाथ थरवळ पुरस्कृत रोख २५,००० हजार रुपये आणि सन्मानचिन्ह )
एकांकिका : एकांकिका : १४ इंचाचा वनवास – सादरकर्ते : संहिता क्रिएशन, मुंबई

सर्वोत्कृष्ट एकांकिका द्वितीय क्रमांक
(कवी कै. रामचंद्र विष्णू कोंडेकर स्मरणार्थ डॉ.अलका नाईक पुरस्कृत रोख १५,००० रुपये आणि सन्मानचिन्ह )
एकांकिका: एकांकिका : A Tale of Two – सादरकर्ते : बीएमसीसी पुणे

सर्वोत्कृष्ट लेखक : प्रथम क्रमांक
(श्री. गंगाराम गवाणकर पुरस्कृत रोख रुपये ११,००० आणि सन्मानाचिन्ह )
कार्तिक बहिरट आणि राज दीक्षित – एकांकिका – A Tale of Two : सादरकर्ते बीएमसीसी पुणे

सर्वोत्कृष्ट लेखक द्वितीय क्रमांक
(कै. सुरेश नारायण दरेकर स्मरणार्थ सचिन दरेकर पुरस्कृत रोख ९,००० आणि सन्मान चिन्ह)
*रोहित कोतेकर ,रोहन कोतेकर ,केतन साळवी* – एकांकिका :१४ इंचाचा वनवास – सादरकर्ते : संहिता क्रिएशन, मुंबई

सर्वोत्कृष्ट दिग्दर्शक प्रथम क्रमांक
(आशिष पाथरे पुरस्कृत रोख ५,००० आणि सन्मानचिन्ह)
*रोहित कोतेकर ,रोहन कोतेकर ,केतन साळवी* – एकांकिका : १४ इंचाचा वनवास – सादरकर्ते : संहिता क्रिएशन, मुंबई

सर्वोत्कृष्ट दिग्दर्शन द्वितीय क्रमांक
(कै. सिंधू औंधे स्मरणार्थ अरविंद औंधे पुरस्कृत रोख ३,००० आणि सन्मानचिन्ह)
*कार्तिक बहिरट* – एकांकिका :A Tale of Two* – सादरकर्ते : बीएमसीसी पुणे

सर्वोत्कृष्ट कथा विस्तार प्रथम
(सौ. श्वेता पेंडसे पुरस्कृत रोख रु.३,००० व सन्मानचिन्ह)
*कार्तिक बहिरट /राज दीक्षित* – एकांकिका : A Tale of Two – सादरकर्ते : बीएमसीसी पुणे

सर्वोत्कृष्ट कथा विस्तार द्वित्तीय
(लेखक कवी कै.राजा गायंगी स्मरणार्थ शिल्पा गायंगी गंजी पुरस्कृत रोख २,००० आणि सन्मानचिन्ह)
*रोहित कोतेकर ,रोहन कोतेकर ,केतन साळवी* – एकांकिका : १४ इंचाचा वनवास – सादरकर्ते : संहिता क्रिएशन, मुंबई

विनोदी अभिनेता
(कै. पद्माकर तांबे स्मरणार्थ सुनीता तांबे पुरस्कृत रोख २,००० आणि सन्मानचिन्ह)
*राज दीक्षित* – एकांकिका : A Tale of two – सादरकर्ते : बीएमसीसी पुणे

विनोदी अभिनेता
(कै. भालचंद्र घाडीगावकर स्मरणार्थ अरुण घाडीगावकर पुरस्कृत रोख २,००० आणि सन्मानचिन्ह )
अमेय परब – एकांकिका : १४ इंचाचा वनवास – सादरकर्ते : संहिता क्रिएशन, मुंबई

*सर्वोत्कृष्ट अभिनेत्री प्रथम क्रमांक*
(कै.याज्ञसेना देशपांडे स्मरणार्थ राजेश देशपांडे पुरस्कृत रोख ३,००० आणि सन्मानचिन्ह)
*श्रेयसी वैद्य* – एकांकिका – खूप लोक आहेत – सादरकर्ते : अभिनय, कल्याण.

*सर्वोत्कृष्ट अभिनेत्री द्वितीय क्रमांक*
(कै. लतिफा काझी स्मरणार्थ खलिदा शेख पुरस्कृत रोख २,००० रुपये आणि सन्मानचिन्ह )
*साक्षी पाटील* – एकांकिका : Who is the culprit – सादरकर्ते : स्वामी नाट्यांगण ,डोंबिवली

*अभिनेता प्रथम क्रमांक*
(कै. कुमुदिनी गोविंद आपटे स्मरणार्थ विवेक आपटे पुरस्कृत रोख ३,००० आणि सन्मानचिन्ह.)

*रंजन प्रजापती* – एकांकिका : १४ इंचाचा वनवास – सादरकर्ते : संहिता क्रिएशन, मुंबई

*अभिनेता द्वितीय क्रमांक*
(कै. एम एम काझी स्मरणार्थ खलिदा शेख पुरस्कृत रोख २,००० रुपये आणि सन्मानचिन्ह )
*रोशन मोरे* – एकांकिका : खूप लोक आहेत – सादरकर्ते : अभिनय कल्याण

*विशेष लक्षवेधी सादरीकरण – नम्रता कलाविष्कार नाशिक*
(प्राथमिक फेरी)

*सर्वोत्कृष्ट रंगमंच व्यवस्थापन*
(नर्मदा डिझाईन फाउंडेशन तर्फे उमेश ओमाशे पुरस्कृत रोख २,००० आणि सन्मानचिन्ह)
सादरकर्ते : *स्वामी नाट्यांगण* – डोंबिवली

*सर्वोत्कृष्ट रंगभूषा*
(कै. रोहिणी दामोदर सावंत स्मरणार्थ विठ्ठल सावंत पुरस्कृत रोख २,००० आणि सन्मानचिन्ह )
*कार्तिक बहिरट* – एकांकिका : A tale of Two – सादरकर्ते : बीएमसीसी पुणे

*सर्वोत्कृष्ट वेशभूषा*
(मालती यादव आदरार्थ सौ. भावना सोनवणे पुरस्कृत रोख २,०००आणि सन्मानचिन्ह)
*मधुरा राऊत आणि रिद्धी टेंबवलकर* – एकांकिका : १४ इंचाचा वनवास – सादरकर्ते : संहिता क्रिएशन, मुंबई

*सर्वोत्कृष्ट संगीत*
(सौ. सुलभा चव्हाण पुरस्कृत रोख २,००० आणि सन्मानचिन्ह)
*शुभम ढेकळे* – एकांकिका : १४ इंचाचा वनवास – सादरकर्ते : संहिता क्रिएशन, मुंबई

*सर्वोत्कृष्ट नेपथ्य*
(शिघ्र नागरी लिपीकार कै. डॉ. श्री. वा. भागवत स्मरणार्थ भागवत कुटुंबाकडून रोख २,००० आणि सन्मानचिन्ह )
*कार्तिक बहीरट आणि अथर्व ढेबे* – एकांकिका: A tale of two – सादरकर्ते : बीएमसीसी पुणे

*सर्वोत्कृष्ट प्रकाशयोजना*
(रोहिणी दामोदर सावंत स्मरणार्थ विठ्ठल सावंत पुरस्कृत रोख २,००० आणि सन्मान चिन्ह )
*निखिल मारणे* – एकांकिका : A Tale of Two – सादरकर्ते : बीएमसीसी पुणे
May 8, 2024

सबसे कातिल “गौतमी पाटिल “द महाराष्ट्र फाईल्स उघडणार

सबसे कातिल गौतमी पाटिल या नावाची ओळख महाराष्ट्राला सांगण्याची गरज नाही. सोशल मीडिया स्टार गौतमी पाटिल ही स्टेज डान्सर म्हणून महाराष्ट्रात प्रसिद्ध आहे. चुकीचे हावभाव करून लावणी केल्याप्रकरणी तिच्यावर सर्व स्तरातून टिका करण्यात आली होती आता मात्र भविष्यात असा प्रकार पुन्हा होणार नसल्याचे तिने स्पष्ट केले आहे.

संजीवकुमार राठोड निर्मीत व दिग्दर्शित “द महाराष्ट्र फाईल्स” या आगामी मराठी चित्रपटात गौतमी पाटिल थिरकताना दिसणार आहे. आजपर्यंत महाराष्ट्राने गौतमी ला पारंपारिक वेशभूषेत पाहीले आहे. पण आता या चित्रपटात गौतमी ही एका हिंदी गाण्यावर डान्स बार गर्ल च्या लुक मध्ये दिसणार आहे. महाराष्ट्रामध्ये गौतमी चे करोडो चाहते आहेत. या लुक मध्ये पाहण्याची उत्सुकता तरुण वर्गात मोठ्या प्रमाणावर आहे. गौतमी ला डान्स बार गर्ल च्या रुपात पाहण्यासाठी प्रेक्षक उतावीळ होत आहेत. हा बिग बजेट चित्रपट असून या चित्रपटात मोठी स्टार कास्ट आहे.

८५० चित्रपटगृहांमध्ये प्रदर्शित होणार सिनेमा

“द महाराष्ट्र फाईल्स ” हा चित्रपट संपुर्ण महाराष्ट्रात, देशात व जगभरात 850 पेक्षा अधिक चित्रपटगृहात रिलीज होणार आहे. पहिल्याच दिवशी 850 चित्रपटगृहात रिलीज होणारा हा पहिला मराठी चित्रपट आहे. या चित्रपटात संजीवकु‌मार राठोड हे। लेखक, निर्माते व दिग्दर्शक आहेत. संजीवकुमार राठोड यांनी माजी सेन्स‌र बोर्ड सदस्य, भारत सरकार मध्ये प्रदिर्घ काळ काम केले आहे.

कोणते कलाकार दिसणार?

या चित्रपटात मुख्य भुमिका मंगेश देसाई, उषा नाडकर्णी, प्रणवराव राणे, सयाजी शिंदे, रोहीत चौधरी,नागेश भोसले, वीणा जामकर, आर्यन राठोड, नितीन जाधव, सुरेश पिल्ले, सुनिल गोडसे, कृतीका तुळसकर, सुशिल राठोड, मानसी चव्हाण, वीरुस्वामी, रवि धनवे, प्रमोद गायकवाड यांनी केली आहेत.

या चित्राटाताला संगीत नितीन-अजित, सिदार्थ कश्यप, संजय लोंढे यांनी दिले आहे. कला दिग्दर्शन उल्हास नान्द्रे व जगन्नाथ हातनकर व अफसर खान यांनी केले आहे गायन अजय अतुल फेम अजय गोगावले, आनंद शिंदे, वैशाली माडे, साक्षी होळकर ,अमरिश आणि शांताबाई फेम संजय लोंढे, यांनी केले आहे. एडिटर- संजय इंगळे, कोरीयोग्राफर – विष्णु देवा, राहुल थोंबरे , संजीव हावलदार, प्रवीण सुर्यवंशी DOP – तनवीर मीर व नागराज दिवाकर. Costume Designer – धनश्री सालेकर हिदेन्द्र कपोपरा, जिम्मी, Background Score – मंगेश धाकडे साऊंड डिझाईन – कामोद खराडे,

या चित्रपटाची सहनिर्माती शालीनी राठोड व रोहीत चौधरी यांनी केली असून विक्रांत अंटील हे क्रियेटीव्ह प्रोडूसर आहेत. शादाब अख्तर व विकास मिश्रा हे कार्यकारी निर्माता आहेत संजय आर, किरण कोळी व सुनीता गोन्सलवीस हे प्रोडक्शन मॅनेजर आहेत, सोम चव्हाण यांनी व्हिज्युअल प्रोमोशन केले आहे.

डायरेक्टर टीम मध्ये असोशिएट डायरेक्ट – विक्रम सिंग चव्हाण , चीफ असिस्टंट डायरेक्टर – रवि धनवे, अँक्शन डायरेक्टर -संतोष दहीफळे असिस्टंट डायरेक्टर – विशाल पाटील, समिर गायकवाड, रूपेश पवार, निखील काळे व सोम्या आहेत. शालीनी राठोड ह्या क्रियेटीव्ह डायरेक्टर आहेत. या चित्रपटाला गीतकार गुरू ठाकूर ,संजय लोढे, शकील आझमी, डॉ विनायक पवार, सुशिल राठोड दीपक अंगेवार व अण्णा सुरवाडे आहेत.

हा चित्रपट सामाजिकरित्या वंचित व दुर्बल घटकावर व त्यांच्या समस्यावर आधारीत आहे. चित्रपटाचे लेखक निर्माते व दिग्दर्शक संजीवकुमार राठोड याच्यानुसार हा चित्रपट म्हणजे Common Citizen’s file आहे. हा चित्रपट कुठल्याही राजकिय पार्टी चा अंजेडा नाही आहे. सर्वसामान्य शेतकरी, विधवा महिला, विद्यार्थी यांची फाईल असून सर्व राजकिय पक्षांनी सर्व सरकारी व प्रायव्हेट नोकरी करणाऱ्या सर्व पक्षाच्या कार्यकत्यांनी आवर्जुन पहावे अशी विनंती केली आहे.
या चित्रपटाचे डायलॉग संजीवकुमार राठोड, सुशिल राठोड , विक्रमसिंग चव्हाण आणि रवि धनवे आहेत.

कधी प्रदर्शित होणार प्रदर्शित?

हा चित्रपट महाराष्ट्रामध्ये सर्व थिएटरर्स , भारतात व जगभरात मिळून 850 चित्रपटगृहात 13 सप्टेंबर 2024 रोजी प्रदर्शित होणार आहे.

या चित्रपटाचे वैशिष्ट्य म्हणजे या चित्रपटामध्ये शांताबाई या फेमस गाण्यावर सनि लियोनी थिरकणार आहे. हरियानाची डान्सर सपना चौधरी पहिल्यांदा मराठमोळ्या रूपात दिसणार आहे. व गौतमी पाटिल ह्या डान्सबार गर्लच्या रूपात मराठी चित्रपटामध्ये हिंदी गाण्यावर थिरकताना दिसणार आहे
May 7, 2024

‘होय महाराजा’ चित्रपटाचा टीझर प्रदर्शित…

३१ मे रोजी संपूर्ण महाराष्ट्रात प्रदर्शित होणार ‘होय महाराजा’

नवनवीन प्रयोग, आशयघन कथानक आणि अनोख्या सादरीकरणाच्या बळावर मराठी चित्रपट प्रेक्षकांवर मोहिनी घालत तिकिटबारीवर चांगली कमाई करण्यात यशस्वी होत आहेत. याच वाटेने जाणारा आणखी एक प्रयोगशील सिनेमा ३१ मे रोजी संपूर्ण महाराष्ट्रात प्रदर्शित होणार आहे. ‘होय महाराजा’ या आगामी मराठी चित्रपटाचा टीझर नुकताच प्रदर्शित करण्यात आला आहे. ‘होय महाराजा’चा टीझर सोशल मीडियावर नेटकऱ्यांचं लक्ष वेधत आहे.

एलएमएस फिल्म्स प्रा. लि. या बॅनरखाली बनणाऱ्या ‘होय महाराजा’चं दिग्दर्शन शैलेश एल. एस. शेट्टी यांनी केलं आहे. ‘होय महाराजा’च्या रूपात प्रेक्षकांना कौटुंबिक मनोरंजन करणारा धम्माल विनोदी चित्रपट पाहायला मिळणार आहे. या चित्रपटात प्रथमेश परब मुख्य भूमिकेत दिसणार असून, त्याच्या जोडीला मराठीतील आघाडीचे कलाकार आहेत. प्रथमेशची जोडी अभिनेत्री अंकिता ए. लांडे सोबत बनली आहे. याखेरीज अभिजीत चव्हाण, संदीप पाठक, वैभव मांगले, समीर चौघुले आदी कलाकारांचाही या चित्रपटात समावेश आहे. क्राईम-कॅामेडी असलेल्या ‘होय महाराजा’मध्ये नेमकं काय पाहायला मिळणार याची झलक टीझरमध्ये दिसते. एका अनोख्या संकल्पनेवर आधारलेल्या या चित्रपटात प्रेमकथेतील आजवर कधीही समोर न आलेले पैलू पाहायला मिळणार आहे. एका रोमांचक प्रेम कहाणीला प्रासंगिक विनोद आणि सुरेल गीत-संगीताची सुरेख किनार जोडण्यात आली आहे. प्रेक्षकांना पोट धरून हसायला लावताना हा चित्रपट अंतर्मुखही करेल असे मत दिग्दर्शक शैलेश एल. एस. शेट्टी यांनी व्यक्त केले आहे.

संचित बेद्रे यांनी ‘होय महाराजा’ चित्रपटाची कथा, पटकथा आणि संवाद लिहिले आहेत. गुरु ठाकूरच्या लेखणीतून अवतरलेल्या गीतरचना चिनार-महेश या संगीतकार दुकलीनं संगीतबद्ध केल्या आहेत. अमेया नरे, साजन पटेल यांनी पार्श्वसंगीत दिलं असून, कोरिओग्राफर फुलवा खामकरने नृत्य दिग्दर्शनाची जबाबदारी सांभाळली आहे. सिनेमॅटोग्राफी डिओपी वासुदेव राणे यांनी केली असून, निलेश नवनाथ गावंड यांनी संकलन केलं आहे. कला दिग्दर्शन संतोष फुटाणे यांनी केलं आहे, तर अॅक्शन दिग्दर्शन फाईट मास्टर मोझेस फर्नांडिस यांनी केलं आहे. वेशभूषा जान्हवी सावंत सुर्वे यांनी केली आहे.
May 6, 2024

मकरंद देशपांडे यांचा सिद्धयोगी अवतार

मोजक्याच तरीही लक्षवेधी भूमिका करत रंगभूमी आणि रुपेरी पडद्यावर अभिनेता मकरंद देशपांडे यांनी आपल्या अभिनयाचा जबरदस्त ठसा उमटवला आहे. या अवलिया कलाकाराने प्रेक्षकांच्या मनावर अधिराज्य गाजवले आहे, त्यामुळे त्यांच्या नव्या भूमिकेविषयी रसिकांना कायमच उत्सुकता लागून राहिलेली असते. ‘अल्याड पल्याड’ या आगामी मराठी चित्रपटाच्या निमित्ताने ते तंत्र-मंत्र यात पारंगत असलेल्या एका सिद्धयोगी साधूची भूमिका साकारताना दिसणार आहेत. एस.एम.पी प्रोडक्शन् अंतर्गत ‘अल्याड पल्याड’ चित्रपट १४ जूनला प्रेक्षक भेटीला येणार आहे. या चित्रपटाची निर्मिती शैलेश जैन आणि महेश निंबाळकर यांनी केली असून दिग्दर्शन प्रीतम एस के पाटील यांचे आहे.

आपला महाराष्ट्र हा विविधतेने नटलेला आहे. त्यात अनेक जुन्या संस्कृती, तसेच प्रथा, परंपरा आहेत. अशाच एका वेगळ्या परंपरेची आराधना करण्याची प्रथा असणाऱ्या दुर्गम भागातल्या एका गावाची, तिथल्या माणसांची रहस्यमय कथा असलेला ‘अल्याड पल्याड’ हा थरारपट आहे.

आव्हानात्मक भूमिका करायला मला नेहमीच आवडतात.‘अल्याड पल्याड’ मधली भूमिका एका मांत्रिकाची आहे, त्याला पूर्ण सिद्धी प्राप्त नाही,त्यातून तो त्या गावाला कसा वाचवणार? याची अतिशय थरार गोष्ट यात मांडलीय. प्रेक्षकांना हा चित्रपट नक्कीच खिळवून ठेवेल यात शंका नाही असं मकरंद देशपांडे सांगतात.

गौरव मोरे, सक्षम कुलकर्णी, सुरेश विश्वकर्मा, भाग्यम जैन, अनुष्का पिंपुटकर आदि कलाकारांच्या भूमिका ‘अल्याड पल्याड’ चित्रपटात आहेत. कथा प्रीतम एस के पाटील यांची असून पटकथा संवाद संजय नवगिरे यांचे आहेत. छायांकन योगेश कोळी यांचे तर संकलन सौमित्र धरसुलकर यांचे आहे. वेशभूषा अपेक्षा गांधी तर ध्वनी स्वरूप जोशी यांचे आहे. लाईन प्रोड्यूसर दिपक कुदळे पाटील आहेत.
May 6, 2024

“कासरा” चित्रपटातून घडणार शेतकऱ्यांच्या जगण्याचं दर्शन!!

अभिनेत्री स्मिता तांबेची मध्यवर्ती भूमिका !!

शेतकऱ्याचं जगण्याच्या संघर्षाचं दर्शन घडवणाऱ्या कासरा चित्रपटाचा ट्रेलर लाँच करण्यात आला आहे. शेती, शेतकरी या विषयावर आजवर अनेक चित्रपट झाले असले, तरी कासरा वेगळा ठरणार असून, सकस कथानक, उत्तम अभिनय असलेला हा चित्रपट २४ मे रोजी महाराष्ट्रात सर्वत्र प्रदर्शित होत आहे.

रवी नागपूरे यांच्या साई उत्सव फिल्म्स या निर्मिती संस्थेनं कासरा चित्रपटाची निर्मिती केली आहे. विकास विलास मिसाळ यांनी चित्रपटाचं दिग्दर्शन केलं आहे. रवी नागपूरे यांच्याच कथेवर महेंद्र पाटील यांनी पटकथा आणि संवादलेखन केलं आहे. अविनाश सातोसकर यांनी छायांकन, प्रशांत नाकती, संकेत गुरव यांनी संगीत दिग्दर्शन, प्रशांत नाकती यांनी गीतलेखन केलं आहे. चित्रपटात स्मिता तांबे, गणेश यादव, जनमेजय तेलंग, तन्वी सावंत, राम पवार, प्रकाश धोत्रे, डॉ. वंदना पटेल, कुणाल सुमन, साई नागपूरे, देवेंद्र लुटे, विशाल अर्जून यांच्या भूमिका आहेत.

“कासरा” २४ मे पासून संपूर्ण महाराष्ट्रात

शेतकरी, शेती यांच्याशी संंबंधित बाजारपेठ, हमीभाव, तंत्रज्ञान असे अनेक मुद्दे आहेत. त्यामुळेच पारंपरिक शेती ते आधुनिक शेती या अनुषंगाने शेतकऱ्यांचं जगणं, संघर्षाची कथा कासरा हा चित्रपट दाखवतो. चित्रपटाचा टीजर, गाण्यांना उत्तम प्रतिसाद मिळाला आहे. ट्रेलरमधून विषयाचं गांभीर्य दाखवतानाच चित्रपटाचं उत्तम कथानक, अनुभवी कलाकार, अभिनययासह चित्रपट तांत्रिकदृष्ट्या सक्षम असल्याचंही दिसतं. त्यामुळेच चित्रपटाविषयी आता उत्सुकता वाढली आहे. शेतकऱ्याचं आयुष्य मोठ्या पडद्यावर पाहण्यासाठी २४ मेपर्यंत वाट पहावी लागणार आहे.

Trailer Link

https://youtu.be/Hr1lsU2iH9k?si=k09lws4wl3k9qHK5
May 5, 2024

प्रसिध्द अभिनेते क्षितीज झारापकर यांचे निधन

प्रसिध्द अभिनेते क्षितीज झारापकर यांचे आज हृदयविकाराच्या धक्क्याने निधन झाले, गेल्या काही महिन्यांपासून ते कर्करोगाने आजारी होते. ते ५८ वयाचे होते.त्यांचे अंत्यदर्शन त्यांच्या राहत्या घरी पत्ता – क्षितिज झारापकर, ३६ भवानी भवन, भवानीशंकर रोड, दादर, मुंबई ४०००२८, शारदाश्रम शाळेसमोर. २.०० ते ३.०० वा. वाजता होईल आणि अंत्यविधी
३.३० वा. शिवाजी पार्क स्मशानभूमी
विद्युत दाहिनी येथे करण्यात येईल.

क्षितिज यांनी करूया उद्याची बात, ठेंगा,गोळाबेरीज,
धुरंधर भाटवडेकर ह्या चित्रपटांचे लेखनर दिग्दर्शन केलं होतं.

सुंदरा मनामध्ये भरली ह्या नाटकाच्या चमू बरोबर शिक्षणासाठी अमेरिकेला गेलेले क्षितीज भारतात आले आणि इथेच मनोरंजन क्षेत्रात रमले, स्थिरावले. सुंदरा मनामध्ये भरली आणि चर्चा तर होणारंच या नाटकातून त्यांना प्रेक्षकांची पसंती मिळली होती. घडलंय बिघडलंय, राजा शिवछत्रपती स्वराज्य रक्षक संभाजी स्वराज्य जननी जिजामाता इत्यादी मालिकांमधून क्षितिज यांनी समर्थ अभिनयाने प्रेक्षकांचं मनोरंजन केलं होतं.