पुणे, फेब्रुवारी २०२५ – मराठी भाषा, साहित्य, कला आणि संस्कृतीच्या संवर्धनासाठी आयोजित ‘विश्व मराठी संमेलन २०२५’ चा सांगता समारंभ दिमाखात पार पडला. या संमेलनात महाराष्ट्राच्या सांस्कृतिक, साहित्यिक, आणि कलाक्षेत्रातील दिग्गजांनी उपस्थित राहून मराठी अभिमानाची मशाल अधिक तेजस्वी केली.

या भव्य सोहळ्याला महाराष्ट्र नवनिर्माण सेनेचे अध्यक्ष मा. राज ठाकरे, राज्याचे उद्योग व मराठी भाषा मंत्री उदय सामंत, अभिनेते रितेश देशमुख, अभिनेते सयाजी शिंदे, साहित्यिक सदानंद मोरे, उल्लासदादा पवार, लक्ष्मीकांत देशमुख, रामदास फुटाणे, राजेश पांडे, रवींद्र शोभणे यांसारखे नामवंत उपस्थित होते.

राज ठाकरे यांच्या हस्ते ‘कलारत्न’ पुरस्कार प्रदान

समारंभात अभिनेते रितेश देशमुख यांना “कलारत्न” पुरस्कार प्रदान करण्यात आला. हा पुरस्कार महाराष्ट्राच्या कलाक्षेत्रातील योगदानासाठी दिला जातो. पुरस्कार स्वीकारताना रितेश देशमुख म्हणाले,

“मराठी भाषा आणि सिनेविश्वाने मला खूप काही दिलं आहे. आज हा सन्मान स्वीकारताना मी प्रचंड कृतज्ञ आहे. महाराष्ट्राच्या सांस्कृतिक ठेव्याला पुढे नेण्यासाठी मी कायम प्रयत्न करत राहीन.”

राज ठाकरे यांचे साहित्यिकांना मार्गदर्शनाचे आवाहन

यावेळी मा. राज ठाकरे यांनी साहित्यिक व लेखकांना समाजप्रबोधनाची जबाबदारी उचलण्याचे आवाहन केले. ते म्हणाले,

“पूर्वी साहित्यिक राजकीय आणि सामाजिक विषयांवर स्पष्ट मत मांडत असत. मात्र, आज तसे दिसत नाही. केवळ पुस्तके लिहून उपयोग नाही, तर साहित्यिकांनी समाजाला मार्गदर्शन केले पाहिजे. मराठी पुस्तकांमधील ज्ञानाचा प्रकाश प्रत्येक घरात पोहोचला पाहिजे. जाती-पातीच्या पलीकडे जाऊन महाराष्ट्राने पुढे जाणे गरजेचे आहे.”

मराठी भाषा संवर्धनासाठी ठोस पावले उचलणार – मंत्री उदय सामंत

राज्याचे उद्योग व मराठी भाषा मंत्री उदय सामंत यांनी मराठी भाषेच्या संवर्धनासाठी सरकारच्या आगामी योजनांची माहिती दिली.

“राज साहेबांच्या हस्ते रितेशचा सत्कार व्हावा, ही आमची इच्छा होती. आज व्यासपीठावरून राज साहेबांचे भाषण ऐकण्याची संधी मिळाली, हा माझ्यासाठी विशेष क्षण आहे. मराठीच्या भल्यासाठी आणि संवर्धनासाठी ज्या काही सूचना येतील, त्या पूर्ण करण्याची ग्वाही मी मराठी भाषा मंत्री म्हणून देतो.”

पुणेकरांची उत्स्फूर्त उपस्थिती

या भव्य संमेलनाच्या सांगता सोहळ्यास हजारो पुणेकरांनी उत्स्फूर्त उपस्थिती लावली. संपूर्ण संमेलनात मराठी भाषेचा अभिमान, साहित्यिकांचा सन्मान, आणि सांस्कृतिक वारशाचे जतन करण्याचा दृढ निश्चय दिसून आला.