काही दिवसांपूर्वीच ‘लाईव्ह’ या मराठी चित्रपटाची घोषणा करण्यात आल्यानंतर गीत ध्वनीमुद्रणाने चित्रपटाचा मुहूर्त करण्यात आला. त्यानंतर चित्रपटाच्या चित्रीकरणाला सुरुवात करण्यात आली आहे. प्रसारमाध्यमांमध्ये झळकलेल्या बातम्यांनी ‘लाईव्ह’बाबत रसिकांमध्ये उत्सुकता वाढवली आहे. सध्या या चित्रपटाचे चित्रीकरण वेगात सुरू आहे.

रिद्धी बिद्दी व्हिजन्स या बॅनरखाली निर्माते सुमित पांडे ‘लाईव्ह’ चित्रपटाची निर्मिती करीत आहेत. या चित्रपटाचे प्रस्तुतकर्ते छबी असीम हल्दर असून, लेखक-दिग्दर्शक संजीव राय आहेत. या चित्रपटाची प्रेरणादायी कथा एका महत्त्वकांक्षी तरुणीभोवती फिरणारी आहे. या कथेच्या अनुषंगाने विविध मुद्द्यांवर प्रकाश टाकण्यात येणार असून, समाजातील विविध घटनांचा वेध घेण्यात येणार आहे. नायिकेच्या संघर्ष आणि न्याय-हक्काच्या लढाईची हृदयस्पर्शी गोष्ट सांगणाऱ्या या चित्रपटाचे चित्रीकरण मुंबईतील मढ, गोरेगाव तसेच आजूबाजूच्या परिसरात सुरू आहे. ‘लाईव्ह’ या शीर्षकावरून चित्रपटात काय पाहायला मिळणार याची कल्पना येत नाही. त्यामुळे चित्रपटाबाबत उत्सुकता वाढली आहे.

या चित्रपटाविषयी दिग्दर्शक संजीव राय म्हणाले की, ‘लाईव्ह’ चित्रपटाची कथा समाजातील वास्तव चित्र दाखवणारी आहे. आजच्या युगात सर्वच क्षेत्रांमध्ये तरुणींनी आपले वर्चस्व सिद्ध केले आहे, तरीही त्यांच्या समोरील आव्हाने कमी झालेली नाहीत. या चित्रपटाची कथाही अशाच आव्हानात्मक प्रवासावर आधारलेली असून, सरकारी व्यवस्थेचा पर्दाफाश करणारी आहे. समाजातील विविध घटकांचा समावेश असलेला हा चित्रपट आजवर कधीही प्रकाशात न आलेले पैलूंवर प्रकाश टाकणार आहे. वास्तवाला मनोरंजनाची जोड देत ‘लाईव्ह’ चित्रपटाच्या माध्यमातून एक संगीतप्रधान कलाकृती प्रेक्षकांच्या भेटीला आणण्यासाठी ‘लाईव्ह’ चित्रपटाची संपूर्ण टिम खूप मेहनत घेत असल्याचेही राय यांनी सांगितले.

दिग्दर्शक संजीव राय आणि पूनम विभूते यांनी चित्रपटातील अर्थपूर्ण संवाद लिहिले आहेत. या चित्रपटात मिलिंद गुणाजी, अनंत जोग, निशिगंधा वाड, रूपाली जाधव, हितेन तेजवानी, सागर काळे, अनिल नागरथ, नम्रता जाधव, विनय राजपूत आदी कलाकारांच्या भूमिका आहेत. गीतकार महालिंग कंठाळे यांनी गीतलेखन केले असून, संगीतकार दिनेश अर्जुना आणि अमन श्लोक या चित्रपटातील गीतांना संगीत देणार आहेत. डिओपी गोपी सिनेमॅटोग्राफी करीत असून, सैफुद्दीन शेख कला दिग्दर्शकाची बाजू सांभाळत आहेत.

“मुलगी ही ओझं नाही, तर घराचा आधार आहे” या संदेशाची भावस्पर्शी मांडणी

समाजातील रूढी, परंपरा आणि स्त्रियांविषयीच्या भेदभावपूर्ण मानसिकतेवर भाष्य करणाऱ्या कथा नेहमीच प्रेक्षकांच्या मनाला स्पर्श करतात. अशाच आशयघन आणि प्रेरणादायी कथानकासह झी मराठीवर नवी मालिका ‘कृष्णाईच्या लेकी’ प्रेक्षकांच्या भेटीला येत आहे. एका खंबीर आईचा संघर्ष, तिच्या मुलींची स्वप्नं आणि समाजाने घालून दिलेल्या चौकटींविरुद्धची त्यांची झुंज या मालिकेतून उलगडणार आहे.

कृष्णाईची प्रेरणादायी कहाणी

या मालिकेची मध्यवर्ती व्यक्तिरेखा आहे कृष्णाई. आयुष्यात अनेक संकटांचा सामना करत ती आपल्या मुलींना शिक्षण, संस्कार आणि आत्मविश्वासाची शिदोरी देते. मुलींचाच जन्म झाल्यामुळे तिच्या पतीने दुसरे लग्न केले, तर समाज आणि कुटुंबानेही तिला कमी लेखले. मात्र या सर्व परिस्थितीतही कृष्णाई खचत नाही. मुलगा नसल्याने स्त्रीचे मूल्य कमी होत नाही आणि मुलीही कोणत्याही बाबतीत मुलांपेक्षा कमी नसतात, हे ती आपल्या कृतीतून सिद्ध करते.

तीन मुली, तीन स्वभाव, तीन वेगळे संघर्ष

कृष्णाईच्या तीन मुलींचा प्रवास ही मालिकेची मुख्य ताकद आहे. मोठी मुलगी शारदा शांत, संयमी आणि आईप्रमाणे समजूतदार आहे. गौरी अन्यायाविरुद्ध आवाज उठवणारी, बंडखोर आणि धाडसी आहे. तर सौदामिनी महत्त्वाकांक्षी, स्वप्नाळू आणि करिअरकेंद्रित आहे. समाजाच्या विविध बंधनांना आणि अन्यायाला सामोरे जाताना या तिघींच्या आयुष्यात अनेक आव्हाने उभी राहतात. मात्र प्रत्येक वेळी कृष्णाई त्यांना खंबीरपणे उभं राहण्याची प्रेरणा देते.

स्त्रीशक्ती, शिक्षण आणि स्वाभिमानाचा संदेश

मुलींच्या शिक्षणासाठी, स्वातंत्र्यासाठी आणि त्यांच्या स्वप्नांच्या पूर्ततेसाठी सुरू असलेली धडपड मालिकेचा महत्त्वाचा भाग आहे. कौटुंबिक दबाव, समाजाचे नियम, लग्न, करिअर आणि नातेसंबंधांतील गुंतागुंत यांमधून अनेक भावनिक आणि नाट्यमय घडामोडी घडताना दिसणार आहेत. “मुलगी ही ओझं नसून घराचा आधार असते” हा मालिकेचा मुख्य संदेश प्रेक्षकांपर्यंत प्रभावीपणे पोहोचवला जाणार आहे.

निवेदिता सराफ पुन्हा झी मराठीवर

या मालिकेच्या निमित्ताने ज्येष्ठ अभिनेत्री निवेदिता सराफ पुन्हा एकदा झी मराठीवर महत्त्वाच्या भूमिकेत दिसणार आहेत. कृष्णाईच्या भूमिकेतून त्या एका संघर्षशील, स्वाभिमानी आणि प्रेरणादायी आईचं व्यक्तिमत्त्व साकारणार आहेत. त्यांच्या सोबत ट्वीकल यादव, रोहित परशुराम, स्मिता सरवदे, संजय कुलकर्णी, साक्षी गांधी आणि एकता लब्दे यांची दमदार कलाकार फळी पाहायला मिळणार आहे.

सक्षम टीमची साथ

लेखक तेजेश घाटगे यांनी मालिकेची कथा लिहिली असून अनिकेत साने दिग्दर्शनाची धुरा सांभाळत आहेत. ओशन फिल्म्स निर्मित ही मालिका संवेदनशील विषयांची वास्तवदर्शी मांडणी आणि प्रभावी कथनशैलीमुळे प्रेक्षकांच्या मनात विशेष स्थान निर्माण करेल, अशी अपेक्षा व्यक्त केली जात आहे.

‘कृष्णाईच्या लेकी’ १५ जूनपासून दररोज संध्याकाळी ७ वाजता फक्त झी मराठीवर प्रेक्षकांच्या भेटीला येणार आहे.

नव्या मालिकेसह, वहिनींसाठी लवकरच खास सरप्राईज !

महाराष्ट्राची महावाहिनी म्हणून आपले स्थान अधिक भक्कम करत झी मराठी ‘ने अत्यंत उत्साहात आणि दिमाखात आपल्या ‘ आंबा महोत्सव २०२६’ च्या दुसऱ्या पर्वाचे आयोजन केले होते. फळांचा राजा आंबा आणि मनोरंजनाची राणी झी मराठी यांनी या महोत्सवात कलाकार, पत्रकार आणि मान्यवर मंडळींसोबत अविस्मरणीय अनुभव घेतला. पहिल्या पर्वाला मिळालेल्या प्रचंड प्रतिसादानंतर झी मराठीने यंदा अधिक भव्य आणि आकर्षक स्वरूपात ‘आंबा महोत्सव’चे दुसरे पर्व सादर केले. या कार्यक्रमाच्या सूत्रसंचालनची जबाबदारी घेतली होती ती अभिनेता प्रणव रावराणे आणि अभिनेत्री तनिष्का विशे यांनी.

या महोत्सवात ‘सनई चौघडे’, ‘कमळी’, ‘तारिणी’, ‘शुभ श्रावणी’, ‘दीपज्योती’, ‘वीण दोघातली हे तुटेना’, ‘सावळ्याची जणू सावली’, ‘लक्ष्मी निवास’ आणि ‘तुला जपणार आहे’ या मालिकांमधील कलाकारांनी उत्साहाने सहभाग घेतला. हास्य, आठवणी आणि आंब्यावर आधारित मजेशीर खेळांनी संपूर्ण दिवस रंगून गेला. सर्वात पहिल्या खेळात जोड्या मंचावर अवतरल्या आणि चढाओढ रंगली ती वर टांगलेल्या टोपलीत कोण जास्त लवकर आंबे पोहोचवणार? या खेळात धमाल उडाली. काही जोडप्यांनी खेळात भाग घेतला, तर काहींनी प्रेक्षक म्हणून या मजेचा मनमुराद आनंद लुटला. यानंतर कलाकारांनी “आंबा-कारल शॉट्स” या खेळात दरम्यान सेटवरील अनेक मजेशीर किस्से उलगडले यात आपल्या लाडक्या ज्योतीला कारल्याचा जूस प्यावा लागला. त्यानंतर घरातील मोठ्यांनी पुढाकार घेत आमरस काढण्याची जबाबदारी सांभाळली. आणि आमरस तयार करून त्यांनी आपल्या टीममधील सह कलाकारांना तो चाखायला दिला आणि आपल्या टीमला विजयी बनवले. शेवटी झी मराठीच्या सर्वात छोट्या सदस्यांनी म्हणजेच सावल्याची जणू सावली मालिकेतील अबीर आणि ओवी यांनी “आंबा-पाणी” हा खेळ रंगवला. या खेळात लहानांपासून मोठ्यांपर्यंत सगळ्यांनीच उत्साहाने सहभाग घेत जल्लोष केला. एकूणच, आंबा महोत्सवात प्रत्येक जण उत्साह, आनंद आणि धमाल मस्तीमध्ये रंगून गेला. खेळांतील विजेत्यांना आणि सर्व कलाकार, पत्रकार मित्रांना हापूस आंब्यांची भेट देण्यात आली, ज्यामुळे उत्सवाची गोडी आणखी वाढली.

याच मंचावरून झी मराठीने त्यांच्या आगामी ‘कृष्णाईच्या लेकी’ ह्या मालिकेचा नवीन प्रोमो पत्रकार आणि प्रेक्षकांसमोर आणला. या मालिकेतून बहुआयामी आणि जेष्ठ अभिनेत्री निवेदिता सराफ ‘कृष्णा आई’ची भूमिका साकारणार आहेत. तसेच, या ‘आंबा महोत्सवात’ आणखी काही खास चाहूलही लागली असून महाराष्ट्रातील लाडक्या वहिनींसाठी एक आनंदाची बातमी ती म्हणजे ‘दार उघड बये’ म्हणत झी मराठी लवकरच कोणीतरी येणार आहे. याचसोबत मराठी Z5 ला एक वर्ष पूर्ण झाल्याचा आनंदही येथे साजरा करण्यात आला आणि वाहिनीने प्रेक्षकांचे मनापासून आभार मानले.

‘आंबा महोत्सव’च्या दुसऱ्या पर्वासह झी मराठीने परंपरा, संस्कृती, आणि प्रभावी कथाकथनाचा उत्सव अधिक भक्कमपणे साजरा केला आहे.

काही मैफिली फक्त ऐकल्या जात नाहीत.
त्या मनात उतरतात.
आणि शेवटचा स्वर संपल्यानंतरही दीर्घकाळ आत कुठेतरी घुमत राहतात.

राहुल देशपांडे यांची अभंगवारी हा तसाच एक अनुभव आहे.

महाराष्ट्राच्या संतपरंपरेतून जन्मलेली ही संगीतमय यात्रा आज जगभरातील रसिकांच्या मनात घर करणारी एक वैश्विक भावयात्रा बनली आहे. तानपुर्‍याचा नाद, टाळ-मृदंगाचा ठेका आणि संतांच्या शब्दांमधील अध्यात्म यांच्या संगमातून अभंगवारी ही केवळ एक मैफल राहत नाही, तर ती एक सामूहिक अनुभूती बनते.

आजच्या धावपळीच्या, आवाजाने भरलेल्या जगात अभंगवारी माणसाला थांबायला शिकवते.
स्वतःकडे परत यायला शिकवते.
मनाने ऐकायला शिकवते.

राहुल देशपांडे यांच्या आवाजात केवळ सुरांची ताकद नाही, तर पूर्ण समर्पण आहे. प्रत्येक अभंग ते गात नाहीत, तर जगतात. म्हणूनच शेकडो वर्षांपूर्वी संतांनी लिहिलेली वाणी आजही इतकी जिवंत वाटते.

आणि कदाचित म्हणूनच अभंगवारी जगभरातील लोकांच्या मनाला स्पर्श करते.

कारण भक्तीला भाषा नसते.

पुण्यात डोळे पुसणारी एक आजी.
लंडनमध्ये पहिल्यांदाच संत तुकाराम ऐकणारा तरुण.
दुबईमध्ये तालावर नकळत टाळ्या वाजवणारे मूल.
मुंबईत दिवसाच्या थकव्याने आलेला एखादा माणूस, जो मैफिल संपेपर्यंत आतून हलका होऊन जातो.

अभंगवारी ही सगळ्यांची आहे.

या प्रवासातील सर्वात सुंदर गोष्ट म्हणजे इथे प्रेक्षक फक्त प्रेक्षक राहत नाहीत. एखाद्या क्षणी संपूर्ण सभागृह एकत्र गाऊ लागते. हात ताल धरू लागतात. डोळे मिटतात. काहींच्या डोळ्यांत पाणी येते. काहींच्या चेहऱ्यावर शांत स्मित उमटते.

आणि काही क्षणांसाठी बाहेरचं जग थांबतं.

मोबाईलचे स्क्रीन विसरले जातात.
दिखावा संपतो.
आणि माणूस पुन्हा मनाने जगू लागतो.

आजच्या काळात हे फार दुर्मिळ आहे.

अल्गोरिदम, वेग आणि क्षणिक प्रसिद्धीच्या युगात अभंगवारीने लोकांना पुन्हा भावनेशी जोडले आहे. संगीत अजूनही माणसाला आतून स्पर्श करू शकते, भक्ती अजूनही लोकांना एकत्र आणू शकते आणि अध्यात्म अजूनही शांतपणे अनुभवता येते, याची जाणीव अभंगवारी करून देते.

म्हणूनच अभंगवारी ही केवळ एक संगीत मैफल राहिलेली नाही.
ती जगभर पोहोचलेली एक सांस्कृतिक आणि आध्यात्मिक चळवळ बनली आहे.

शेवटचा स्वर विरून गेल्यानंतरही काहीतरी मनात राहते.

एक शांत भावना.
एक प्रार्थना.
एक सुंदर हुरहूर.

आणि त्या शांततेत कुठेतरी संत अजूनही गात राहतात.

टेलिव्हिजन, मराठी चित्रपटसृष्टी आणि ओटीटी या तिन्ही माध्यमांमध्ये आपल्या दमदार अभिनयाने वेगळी ओळख निर्माण करणारा अभिनेता आदिनाथ कोठारे सध्या विविध प्रोजेक्ट्समुळे चर्चेत आहे. वैविध्यपूर्ण भूमिका, सहज अभिनयशैली आणि सातत्यपूर्ण कामगिरीमुळे आदिनाथने मराठीसोबतच हिंदी मनोरंजनविश्वातही स्वतःचं खास स्थान निर्माण केलं आहे. सध्या ॲमेझॉन प्राईमवरील ‘सिस्टम’ या प्रोजेक्टमधील त्याच्या भूमिकेची विशेष चर्चा रंगली असून, या प्रोजेक्टमध्ये त्याला कास्ट कसं करण्यात आलं यामागची एक रंजक आणि प्रेरणादायी गोष्ट आता समोर आली आहे.

मनापासून केलेलं मॅनिफेस्टेशन ठरलं खरं

*‘सिस्टम’*मध्ये आदिनाथने ‘आलोक’ ही महत्त्वपूर्ण भूमिका साकारली आहे. या भूमिकेच्या निमित्ताने त्याने नुकताच सोशल मीडियावर एक खास अनुभव शेअर केला. एखादी गोष्ट मनापासून हवी असेल आणि तिच्यासाठी सकारात्मक विचार केला, तर ती आपल्या आयुष्यात नक्की येते, याचा प्रत्यक्ष अनुभव त्याला या प्रोजेक्टमुळे आला असल्याचं त्याने सांगितलं.

आदिनाथ म्हणाला, “मी एका बॉलिवूड अवॉर्ड फंक्शनला गेलो होतो. तिथे माझी भेट दिग्दर्शिका अश्विनी अय्यर तिवारी यांच्यासोबत झाली. गप्पांच्या ओघात मी त्यांना सहज म्हणालो की, मला तुमच्यासोबत काम करण्याची खूप इच्छा आहे. विशेष म्हणजे अगदी दुसऱ्याच दिवशी मला कास्टिंगसाठी फोन आला. त्यानंतर माझं *‘सिस्टम’*साठी ऑडिशन झालं आणि मी या प्रोजेक्टचा भागही झालो. कधी कधी आपण मनापासून मॅनिफेस्ट केलेल्या गोष्टी खरंच पूर्ण होतात.”

दिग्गज कलाकारांसोबत स्क्रीन शेअर

*‘सिस्टम’*मध्ये आदिनाथने दिग्गज अभिनेते आणि दिग्दर्शक आशुतोष गोवारीकर तसेच अभिनेत्री सोनाक्षी सिन्हा यांच्यासोबत स्क्रीन शेअर केली आहे. त्याच्या भूमिकेला प्रेक्षकांकडून चांगला प्रतिसाद मिळत असून, हिंदी ओटीटी विश्वातही त्याच्या अभिनयाची दखल घेतली जात आहे.

बिग बजेट प्रोजेक्ट्समध्ये झळकणार आदिनाथ

आगामी काळात आदिनाथ कोठारे अनेक मोठ्या हिंदी प्रोजेक्ट्समध्ये दिसणार असल्याची चर्चा आहे. विशेष म्हणजे ‘रामायण’ आणि *‘गांधी’*सारख्या बिग बजेट प्रोजेक्ट्समध्येही तो महत्त्वाच्या भूमिकांमध्ये झळकणार असल्याचं समोर येत आहे. त्यामुळे मराठीसोबतच हिंदी इंडस्ट्रीतही आदिनाथचा प्रवास अधिक वेगाने पुढे जाताना दिसत आहे.