शेतकऱ्यांच्या ज्वलंत प्रश्नांवरून देवालाच आव्हान; प्रवीण तरडेंच्या ‘देऊळ बंद २’ चा धमाकेदार ट्रेलर रिलीज!

२०१५ मध्ये प्रदर्शित झालेल्या आणि बॉक्स ऑफिसवर इतिहास घडवणाऱ्या ‘देऊळ बंद’ चित्रपटानंतर प्रेक्षक ज्या सिक्वेलची आतुरतेने वाट पाहत होते, तो क्षण अखेर आला आहे. ‘वटवृक्ष एण्टरटेन्मेंट’ निर्मित आणि प्रविण विठ्ठल तरडे लिखित-दिग्दर्शित ‘देऊळ बंद २’ या बहुप्रतीक्षित चित्रपटाचा थरारक, भावनिक आणि डोळ्यात अंजन घालणारा अधिकृत ट्रेलर सोशल मीडियावर प्रदर्शित करण्यात आला आहे. “आता परीक्षा देवाची…” या उत्कंठावर्धक टॅगलाईनसह येणारा हा चित्रपट २१ मे २०२६ रोजी संपूर्ण महाराष्ट्रात प्रदर्शित होणार आहे.

श्रद्धा, वास्तव आणि संघर्षाची प्रभावी मांडणी

‘देऊळ बंद २’ चे कथानक सामाजिक वास्तव, श्रद्धा आणि मानवी संघर्ष याभोवती फिरताना दिसते. ट्रेलरमध्ये शेतकऱ्यांचे आर्थिक संकट, आत्महत्या आणि ग्रामीण भागातील विदारक वास्तव अत्यंत प्रभावीपणे मांडण्यात आले आहे. वैज्ञानिक दृष्टिकोन आणि अध्यात्म यांच्यातील संघर्षासोबतच देवाचे अस्तित्व, श्रद्धा आणि सामाजिक उत्तरदायित्व यावरही चित्रपट भाष्य करताना दिसतो.

मनाला भिडणारे संवाद

ट्रेलरची सुरुवातच एका आव्हानात्मक प्रसंगाने होते, जिथे स्वामी समर्थांच्या अस्तित्वालाच प्रश्न विचारले जातात. “या देशात सगळं ओरिजनल आहे, डुप्लिकेट फक्त शेतकरी!” तसेच “रोज एक तरी आत्महत्या होणाऱ्या आमच्या या तालुक्यात पुढच्या आठ दिवसांत एकही आत्महत्या झाली नाही पाहिजे… जर झाली तर माझं देऊळ बंद कायमचं!” असे संवाद थेट मनाला भिडतात आणि चित्रपटाचा मुख्य आशय अधोरेखित करतात.

मोहन जोशी पुन्हा स्वामी समर्थांच्या भूमिकेत

चित्रपटाचे कथा, पटकथा, संवाद आणि दिग्दर्शन प्रविण विठ्ठल तरडे यांनी केले आहे. ज्येष्ठ अभिनेते मोहन जोशी पुन्हा एकदा स्वामी समर्थांच्या दैवी भूमिकेत दिसणार असून त्यांच्यासोबत स्नेहल तरडे आणि स्वतः प्रविण तरडे महत्त्वाच्या भूमिकांमध्ये झळकणार आहेत. प्रविण तरडे ‘सदूशेठ’ या प्रभावी व्यक्तिरेखेत दिसणार आहेत.

भव्य निर्मिती आणि सामाजिक प्रबोधनाचा मिलाफ

कैलास वाणी, सौ. जयश्री वाणी, कैवल्य वाणी आणि जुईली वाणी-सूर्यवंशी यांनी या चित्रपटाची निर्मिती केली आहे. ग्रामीण भागाचे वास्तववादी चित्रीकरण, प्रभावी पार्श्वसंगीत आणि श्रद्धेच्या पार्श्वभूमीवर उभा राहणारा सामाजिक प्रश्न यामुळे ‘देऊळ बंद २’ प्रेक्षकांसाठी एक वेगळा अनुभव ठरणार आहे. स्वामी भक्ती आणि सामाजिक प्रबोधन यांचा अनोखा संगम असलेला हा चित्रपट कौटुंबिक प्रेक्षकांसाठी विशेष आकर्षण ठरण्याची शक्यता आहे.

२२ मे रोजी ‘नीता मुकेश अंबानी कल्चरल सेंटर’मधील ‘द ग्रँड थिएटर’ येथे विशेष प्रयोगाचे निमंत्रण

समकालीन मराठी रंगभूमीवर गेल्या काही काळात विशेष चर्चेत राहिलेलं ‘भूमिका’ हे नाटक आता एका नव्या आणि अभिमानास्पद टप्प्यावर पोहोचलं आहे. लेखक क्षितिज पटवर्धन लिखित या गाजलेल्या नाटकाचा अधिकृतपणे मुंबई विद्यापीठाच्या टी. वाय. बी.ए. अभ्यासक्रमात समावेश करण्यात आला आहे. व्यावसायिक यश आणि कलात्मक दर्जा यांचा उत्तम संगम साधणाऱ्या या नाटकाला मिळालेला हा मान मराठी रंगभूमीसाठीही मोठा सन्मान मानला जात आहे.

समकालीन वास्तवावर भाष्य करणाऱ्या नाटकाला शैक्षणिक मान्यता

आजच्या अस्थिर आणि अस्मितांनी व्यापलेल्या सामाजिक वातावरणात मानवता, विवेक आणि प्रामाणिकपणाची जाणीव ठळकपणे मांडण्याची ताकद ‘भूमिका’ या नाटकात असल्याने मराठी अभ्यास मंडळाने या नाटकाचा अभ्यासक्रमात समावेश करण्याचा निर्णय घेतला आहे. नाटकातील विचारप्रवर्तक मांडणी आणि सामाजिक भान यामुळे विद्यार्थ्यांना समकालीन नाट्यरचनेचा सखोल अभ्यास करता येणार आहे.

सचिन खेडेकर यांचे रंगभूमीवर दमदार पुनरागमन

या नाटकाच्या माध्यमातून अभिनेते सचिन खेडेकर यांनी तब्बल २१ वर्षांनंतर रंगभूमीवर पुनरागमन केलं. ज्येष्ठ दिग्दर्शक चंद्रकांत कुलकर्णी यांनी दिग्दर्शित केलेल्या या नाटकात कलाकाराच्या आयुष्यातील मानसिक गुंतागुंत आणि वास्तव व अभिनय यांच्यामधली धूसर होत जाणारी सीमा प्रभावीपणे उलगडण्यात आली आहे.

पुरस्कारांचा वर्षाव आणि दिग्गजांकडून कौतुक

‘भूमिका’ या नाटकाने अल्पावधीतच प्रेक्षकांसोबत समीक्षकांचंही लक्ष वेधून घेतलं. नुकताच या नाटकाला मानाचा ‘मास्टर दीनानाथ मंगेशकर सन्मान’ प्रदान करण्यात आला आहे. आतापर्यंत विविध विभागांमध्ये या नाटकाने तब्बल १५ प्रतिष्ठित पुरस्कार पटकावले आहेत.

विशेष म्हणजे, या नाटकाच्या पुस्तकाचं प्रकाशन ज्येष्ठ गीतकार आणि लेखक जावेद अख्तर यांच्या हस्ते करण्यात आलं होतं. तसेच प्रकाश आंबेडकर, परेश रावल, विकास दिव्यकीर्ती, आयपीएस पानोज कुमार शर्मा, आशुतोष गोवारीकर, कुमार केतकर आणि फिरोज अब्बास खान यांसारख्या अनेक मान्यवरांनी या नाटकाचं मुक्तकंठाने कौतुक केलं आहे.

अवघ्या वर्षभरात १२५ प्रयोगांचा टप्पा

प्रेक्षकांच्या दमदार प्रतिसादामुळे *‘भूमिका’*ने अवघ्या एका वर्षात १२५ प्रयोग पूर्ण करत व्यावसायिक रंगभूमीवरही आपली वेगळी ओळख निर्माण केली आहे. गंभीर विषय हाताळूनही प्रेक्षकांशी नातं जोडण्यात हे नाटक यशस्वी ठरलं आहे.

NMACC मध्ये विशेष प्रयोग

या यशानंतर आता *‘भूमिका’*ला मुंबईतील प्रतिष्ठित ‘नीता मुकेश अंबानी कल्चरल सेंटर’ (NMACC) येथे विशेष प्रयोगासाठी निमंत्रित करण्यात आलं आहे.

स्थळ: द ग्रँड थिएटर, NMACC, मुंबई
दिनांक: २२ मे २०२६
वेळ: संध्याकाळी ७.३० वा.

मुंबई विद्यापीठाच्या अभ्यासक्रमात समावेश झाल्यानंतर आता भावी पिढीला क्षितिज पटवर्धन यांच्या लेखनशैलीचा आणि समकालीन नाट्यभाषेचा अभ्यास करण्याची मोठी संधी उपलब्ध झाली आहे.

झी मराठीवरील ‘सनई चौघडे’ मालिका सध्या एका रंजक वळणावर येऊन पोहोचली आहे. जय आणि शर्वरी यांच्या आयुष्यात आता एका अशा व्यक्तीची एन्ट्री होणार आहे, जिने संपूर्ण महाराष्ट्राच्या घराघरात स्वतःची वेगळी ओळख निर्माण केली आहे. ‘माझ्या नवऱ्याची बायको’ मालिकेतून लोकप्रिय झालेली राधिका सुभेदार आता *‘सनई चौघडे’*मध्ये दिसणार असून अभिनेत्री अनिता दाते पुन्हा एकदा ही गाजलेली भूमिका साकारताना पाहायला मिळणार आहेत.

पुन्हा एकदा राधिका सुभेदार बनताना अनिता दाते भावूक

या भूमिकेबद्दल बोलताना अनिता दाते म्हणाल्या की, “पुन्हा एकदा राधिका सुभेदार साकारताना मला जुन्या आठवणींना उजाळा मिळाल्यासारखं वाटत आहे. २०१६ ते २०२१ या काळात मी या व्यक्तिरेखेच्या माध्यमातून प्रेक्षकांच्या भेटीला येत होते. आजही लोक मला ‘राधिका’ म्हणूनच ओळखतात. ही भूमिका माझ्यासाठी खूप खास आहे.”

त्या पुढे म्हणाल्या की, ‘माझ्या नवऱ्याची बायको’ मालिकेने त्यांचं आयुष्य बदललं आणि अभिनेत्री म्हणून वेगळी ओळख मिळवून दिली. “राधिका सुभेदारने मला फक्त प्रसिद्धी दिली नाही, तर आत्मविश्वासही दिला,” असं त्या सांगतात.

जय खानोलकरच्या ऑफिसमध्ये महिलांसाठी उघडणार नवी दारं

मालिकेत जय खानोलकरच्या ऑफिसमध्ये महिलांना फारसं स्थान नसल्याचं आतापर्यंत पाहायला मिळालं आहे. मात्र राधिकाच्या एन्ट्रीनंतर या वातावरणात मोठे बदल घडताना दिसणार आहेत. शर्वरीला पुन्हा कंपनीत स्थान मिळवून देण्यासाठी राधिका पुढाकार घेणार असून, तिच्या सकारात्मक दृष्टिकोनामुळे कथेला नवं वळण मिळणार आहे.

‘राधिका’ अनेक महिलांसाठी ठरली प्रेरणा

राधिका सुभेदार या व्यक्तिरेखेने अनेक महिलांना प्रेरणा दिल्याचं अनिता दाते यांनी सांगितलं. “अनेक महिलांनी स्वतःचे छोटे व्यवसाय सुरू केले आणि त्या स्वतःच्या पायावर उभ्या राहिल्या. त्या भेटल्यावर सांगतात की हा राधिका सुभेदारचा प्रभाव आहे. हे ऐकून खूप समाधान वाटतं,” असं त्या म्हणाल्या.

‘सनई चौघडे’मध्ये येणार सकारात्मक बदल

झी मराठीसोबतचं आपलं नातं खूप खास असल्याचं सांगताना अनिता दाते म्हणाल्या की, “झी मराठीने नेहमीच स्त्री व्यक्तिरेखा सन्मानाने मांडल्या आहेत. ‘सनई चौघडे’ची टीम खूप छान आहे आणि मालिकेत राधिकाच्या येण्यामुळे एक सकारात्मक आणि मनोरंजक बदल प्रेक्षकांना पाहायला मिळेल.”

प्रेक्षकांसाठी ठरणार उत्सुकतेचा भाग

राधिका सुभेदार जय खानोलकरच्या ऑफिसमध्ये येऊन नेमके कोणते बदल घडवून आणते आणि शर्वरीच्या आयुष्यात कोणती नवी दिशा निर्माण होते, हे पाहणं प्रेक्षकांसाठी उत्सुकतेचं ठरणार आहे.

पहा ‘सनई चौघडे’ दररोज रात्री ८ वा. फक्त झी मराठीवर.

मराठी चित्रपटसृष्टीत सध्या वेगळ्या आणि मनोरंजक कथानकांवर आधारित चित्रपटांना प्रेक्षकांचा चांगला प्रतिसाद मिळताना दिसत आहे. अशातच आता पारंपरिक लग्न पद्धतीला आधुनिक विचारांची जोड देणारा ‘कप बशी’ हा नवा मराठी चित्रपट प्रेक्षकांच्या भेटीला येत आहे. नुकताच या चित्रपटाचा टीजर प्रदर्शित करण्यात आला असून, त्यामधून एक वेगळी आणि खुसखुशीत कौटुंबिक कथा पाहायला मिळणार असल्याची झलक समोर आली आहे. येत्या १९ जून रोजी हा चित्रपट संपूर्ण महाराष्ट्रात प्रदर्शित होणार आहे.

अनोख्या अटीवर आधारित भन्नाट कथा

भारतीय विवाह पद्धतीत मुलगा आणि मुलगी यांच्या पत्रिका जुळवण्याची परंपरा आजही अनेक घरांमध्ये पाहायला मिळते. मात्र ‘कप बशी’मध्ये या पारंपरिक विचारांना एक भन्नाट ट्विस्ट देण्यात आला आहे. लग्नासाठी होकार देण्याआधी नवरी मुलगी आपल्या होणाऱ्या सासूसमोर एक वेगळीच अट ठेवते — सासू आणि सुनेची पत्रिका जुळली पाहिजे! या अटीमुळे निर्माण होणारा गोंधळ, विनोदी प्रसंग आणि कौटुंबिक नात्यांमधील रंगतदार घडामोडी चित्रपटात पाहायला मिळणार आहेत.

टीजरमधून वाढली उत्सुकता

चित्रपटाचा टीजर प्रेक्षकांच्या उत्सुकतेत भर घालणारा ठरत आहे. हलक्याफुलक्या शैलीत मांडलेली कथा, खुसखुशीत संवाद आणि कौटुंबिक मनोरंजनाचा बाज यामुळे टीजरला सोशल मीडियावर चांगला प्रतिसाद मिळत आहे. विशेष म्हणजे पूजा सावंत आणि ऋषी मनोहर ही नवी जोडी या चित्रपटातून पहिल्यांदाच एकत्र झळकणार असून, त्यांची केमिस्ट्रीही प्रेक्षकांच्या पसंतीस उतरताना दिसत आहे.

तगडी कलाकारांची फळी

‘कप बशी’मध्ये अभिनेत्री निर्मिती सावंत, पूजा सावंत, ऋषी मनोहर, नयना आपटे, अनंत जोग, राहुल रानडे, आनंद इंगळे, आनंद काळे, चिन्मय शिंत्रे आणि उमा सरदेशमुख यांच्या प्रमुख भूमिका आहेत. अनुभवी कलाकारांसोबत नव्या कलाकारांचीही दमदार साथ या चित्रपटाला लाभली आहे.

तांत्रिक बाजूही ठरणार खास

सुकल्प चित्र निर्मित या चित्रपटाचे निर्माते कल्पक सदानंद जोशी आहेत. बिग ब्रेन प्रॉडक्शन्सचे निलेश रामगोपाल राठी यांनी चित्रपटाची प्रस्तुती केली आहे. चेतन सैंदाणे यांनी पटकथा आणि संवाद लिहिले असून दिग्दर्शनाची धुरा वैभव रामकृष्ण चिंचाळकर यांनी सांभाळली आहे.

विशेष म्हणजे मराठी चित्रपटसृष्टीला प्रथमच ज्येष्ठ संगीतकार उत्तम सिंग यांचे संगीत या चित्रपटाच्या निमित्ताने लाभले आहे. गीतलेखन गुरु ठाकूर यांनी केले असून छायांकन बाळू दहिफळे यांनी केले आहे. संकलन आशिष म्हात्रे, ध्वनी संयोजन राष्ट्रीय पुरस्कार विजेते मंदार कमलापूरकर, तर लूक डिझायनर म्हणून राष्ट्रीय पुरस्कार विजेते श्रीकांत देसाई यांनी काम पाहिले आहे. नृत्य दिग्दर्शन दीपाली विचारे, कला दिग्दर्शन महेश कुडाळकर आणि प्रोजेक्ट हेड म्हणून चिन्मय शिंत्रे यांनी जबाबदारी सांभाळली आहे.

मनोरंजनासोबत नात्यांवर हलकंफुलकं भाष्य

आजच्या आधुनिक काळातही परंपरा, पत्रिका आणि लग्न जुळवण्याच्या संकल्पना समाजात महत्त्वाच्या मानल्या जातात. त्याच विषयावर हलक्याफुलक्या पद्धतीने भाष्य करत ‘कप बशी’ हा चित्रपट कौटुंबिक मनोरंजनाची मेजवानी घेऊन येणार आहे. विनोद, नाती आणि आधुनिक विचारांची सांगड घालणारा हा चित्रपट प्रेक्षकांसाठी एक वेगळा अनुभव ठरणार आहे.

मराठी रंगभूमी सध्या नव्या विचारांनी, तरुण ऊर्जेने आणि समकालीन विषयांनी समृद्ध होताना दिसत आहे. बदलत्या काळानुसार नातेसंबंध, सामाजिक वास्तव आणि आजच्या पिढीच्या भावविश्वावर आधारित नवे प्रयोग रंगभूमीवर पाहायला मिळत आहेत. जुन्या-जाणत्या कलाकारांसोबत नव्या कलाकारांनाही व्यासपीठ मिळत असून, त्यातून मराठी नाटकांना एक वेगळीच ताजेपणाची झळाळी प्राप्त होत आहे. अशाच नव्या दमाच्या कलाकारांना घेऊन ‘दृष्टी’ आणि ‘अद्वैत थिएटर्स’ निर्मित ‘जोडीचा मामला’ हे दोन अंकी विनोदी नाटक आता प्रेक्षकांच्या भेटीला येत आहे.

पत्रकार परिषदेत सचिन पिळगांवकरांची उपस्थिती

या नाटकाची पत्रकार परिषद नुकतीच उत्साहात पार पडली. या वेळी प्रसिद्ध अभिनेते, दिग्दर्शक आणि निर्माता सचिन पिळगांवकर यांनी विशेष उपस्थिती लावत नाटकाच्या संपूर्ण टीमला शुभेच्छा दिल्या. नव्या कलाकारांच्या सहभागामुळे मराठी रंगभूमीला नवी ऊर्जा मिळेल आणि हा बदल नाट्यव्यवसायासाठी अत्यंत सकारात्मक असल्याचं मत त्यांनी व्यक्त केलं.

‘Black & White कुटुंबाची सप्तरंगी गोष्ट!’

‘जोडीचा मामला’ या नाटकाची टॅगलाईनच प्रेक्षकांची उत्सुकता वाढवणारी आहे — ‘Black & White कुटुंबाची सप्तरंगी गोष्ट!’ आजच्या तरुणाईचा आत्मकेंद्रित दृष्टिकोन, बदलती सामाजिक मानसिकता आणि त्याचा कुटुंबावर होणारा परिणाम यावर हे नाटक उपरोधिक आणि विनोदी शैलीत भाष्य करतं. मनोरंजनासोबतच विचार करायला भाग पाडणारा हा रंगमंचीय प्रयोग असल्याचं सांगितलं जात आहे.

राहुल भंडारे आणि श्रेयस इंदापूरकर यांची नवी संकल्पना

निर्माते राहुल भंडारे म्हणाले, “आजच्या तरुण पिढीचे विचार, त्यांच्या नात्यांकडे पाहण्याचा दृष्टिकोन आणि कुटुंबातील बदलती समीकरणं यावर हलक्याफुलक्या शैलीत भाष्य करणारे नाटक प्रेक्षकांसमोर आणण्याचा आमचा प्रयत्न आहे. नव्या कलाकारांना व्यासपीठ देत दर्जेदार मनोरंजन सादर करण्याचा प्रयत्न प्रेक्षकांना नक्की आवडेल.”

दिग्दर्शक श्रेयस इंदापूरकर म्हणाले, “‘जोडीचा मामला’ करताना आम्ही विनोदाच्या माध्यमातून आजच्या समाजातील वास्तव मांडण्याचा प्रयत्न केला आहे. प्रत्येक पात्र प्रेक्षकांना कुठे ना कुठे स्वतःशी जोडून घेईल. मनोरंजनासोबत विचार करायला भाग पाडणारं हे नाटक प्रत्येक वयोगटाला भावेल.”

दमदार कलाकारांची फळी

या नाटकात योगेश कदम, प्राची कात्रे, पायल साळुंके, वैभव महाले, विशाल दुराफे, अश्विनी माळी, विनायक जाधव, प्रदीप कसबे, श्वेता काजळे, अभिजीत पाटसकर, आकाश राठोड, दुर्गेश लांडगे आणि श्रेयस इंदापूरकर हे कलाकार प्रमुख भूमिकांमध्ये झळकणार आहेत.

नाटकाचे लेखन आणि संगीत चैतन्य कुलकर्णी यांचे असून दिग्दर्शन श्रेयस इंदापूरकर यांनी केले आहे. निर्मिती राहुल भंडारे आणि श्रेयस इंदापूरकर यांनी केली आहे. नेपथ्य संदेश बेद्रे, प्रकाशयोजना शीतल तळपदे, नृत्यदिग्दर्शन ऋषीकेश देसाई यांनी सांभाळले आहे. तसेच अवधूत गुप्ते, श्रद्धा आपटे-केळकर आणि युगंधर देशमुख यांच्या आवाजाने नाटकातील गाण्यांना विशेष रंग चढला आहे. रंगभूषा उलेश कंधारे तर वेशभूषा प्राची कात्रे आणि श्रद्धा हांडे यांनी केली आहे.

प्रयोगांचे वेळापत्रक

‘जोडीचा मामला’चा शुभारंभ प्रयोग शुक्रवार १५ मे रोजी दुपारी ४.३० वाजता गडकरी रंगायतन, ठाणे येथे रंगणार आहे. त्यानंतर शनिवार १६ मे रोजी रात्री ८.३० वाजता आचार्य अत्रे नाट्यगृह, कल्याण, रविवार १७ मे रोजी दुपारी १२ वाजता विष्णुदास भावे नाट्यगृह, वाशी, मंगळवार १९ मे रोजी दुपारी ४ वाजता शिवाजी मंदिर, दादर आणि रविवार ३१ मे रोजी दुपारी ४ वाजता यशवंत नाट्यगृह, माटुंगा येथे प्रयोग होणार आहेत.